Փաստ ինֆո

Ադրբեջանը խուսափում է իրավական գործընթացներից և պահանջում է Հայաստանից՝ հետ վերցնել դիմումները, որովհետև ռազմաքաղաքական դաշտում՝ բանակցություններում, առավելություն ունի, մենք ենք պատերազմում պարտվել, ոչ թե՝ նրանք։ Այս մասին Մեդիա Կենտրոնում «Բաքվում պահվող գերիների ճակատագիրն ադրբեջանական դատարաններում» թեմայով քննարկման ժամանակ ասաց միջազգային իրավունքի փորձագետ Արա Ղազարյանը։

«Մենք ունենք իրավական գործընթացներ կառավարության և մասնավոր խմբերի կողմից։ Սա որոշակի ազդեցություն ունենում է։ Նրանք, որոնք դատավարությամբ զբաղվում են, զգում են, թե ինչպես է փոխվում ձեռագիրը, փաստարկները, բայց խոսել մեծ հաշվով միջազգային արենայում Ադրբեջանի վարքագծի մասին, ապա իրավական գործընթացները պետք է շատ լինեն, երկար ժամանակահատված է պահանջում դրա համար»,- նշեց նա՝ ընդգծելով, որ իրավական գործընթացները գալիս են քաղաքական գործընթացներից հետո, բայց լավ է, որ ցանկացած քաղաքական փաստաթղթի հիմքում դրված են իրավական ստանդարտները, այսինքն՝ նույն այն մարդիկ, որոնք քաղաքական որոշումներ են կայացնում, ուշիուշով հետևում են, թե դատարաններն ինչ որոշումներ են կայացնում, որոնք ոչ միայն հանրային կարծիք են ձևավորում, այլև՝ ստանդարտներ են տալիս։

Նրա խոսքով՝ տարիներ առաջ, երբ առաջին գանգատներն են ներկայացվել, Ադրբեջանը պարբերաբար փոփոխել է իր նարատիվները, փաստարկները։ Վիճակագրությամբ, իհարկե, Ադրբեջանը ավելի շատ է պարտվել իրավական գործընթացներում, քան՝ Հայաստանը, այդ պատճառով էլ Ադրբեջանը խուսափում է իրավական գործընթացներից և պահանջում է Հայաստանից՝ հետ վերցնել դիմումները, որովհետև ռազմաքաղաքական դաշտում առավելություն ունի։ Ղազարյանն ընդգծում է՝ հենց այստեղ էլ կա ազդեցությունը՝ իրավական գործընթացներում։

«Մեր մոտ կառավարությունը չի կարող շատ դեպքում խոսել կամ անել այն, ինչ մասնավոր խմբերը, բայց ես չեմ տեսնում մասնավոր խմբերի կողմից այն ակտիվությունը, որ պետք է լիներ՝ գործերի առատությունը, գանգատների բազմազանությունը և հետևողականությունը»,- նշեց Ղազարյանը՝ դա պայմանավորելով ռեսուրսների կամ ցանկության բացակայությունից։ Նա նշեց, որ ինքը, այլ բազմաթիվ փաստաբաններ, իրավապաշտպաններ աշխատում են, բայց դա շատ քիչ է, պետք է շատ-շատ գանգատներ գնան, մոնիթորինգային զեկույցները շատ լինեն և դա լինի՝ անկախ կառավարությունից։

«Այն, ինչ անում է կառավարությունը, դրա արձագանքը մենք տեսնում ենք, դա լավ եմ գնահատում, բայց կառավարությունը չի կարող անել այն, ինչ մասնավոր խմբերը, որովհետև կառավարությանը պակասում է անաչառությունը և այն, ինչ ասում են իրավապաշտպան կազմակերպությունները, հատկապես՝ հեղինակավոր կազմակերպությունները՝ դա համարվում է ապացույց»,- ասաց Արա Ղազարյանը։

Աղբյուր` Փաստինֆո