Փաստ ինֆո

Ռուսաստանի դեմ արևմտյան պատժամիջոցները տարածվել են նաեւ ապահովագրական ընկերությունների վրա՝ խնդիրներ ստեղծելով այդ թվում ՀՀ քաղաքացիների, ինչպես նաեւ տնտեսվարող սուբյեկտների վրա։

Դեռեւս հունիսին Մեծ Բրիտանիան հայտարարեց Ռուսաստանի նկատմամբ պատժամիջոցների ցանկում եւս 42 ֆիզիկական և իրավաբանական անձանց, ներգրավելու մասին։ Այսուհետ՝ ռուսական խոշոր ապահովագրական «Ինգոսստրախ»-ը գտնվում է պատժամիջոցների տակ։ Ապա նաեւ ԱՄՆ-ն միացավ ապահովագրական ընկերությունների դեմ պատժամիջոցներին։ Դա իր հերթին անդրադարձել է նաեւ Հայաստանի վրա։

«Փաստինֆո»-ի տեղեկություններով՝ «Ինգո Արմենիա» ապահովագրական ընկերությունում ապահովագրում իրականացրած անձինք արտերկրում արդեն որոշակի խնդիրներ են ունենում. Այն չի ճանաչվում միջազգային խաղացողների կողմից։ Մեր տեղեկություններով՝ խնդրի հետ բախվել է նաեւ ԶՊՄԿ-ն, որն արտահանվող արտադրանքն ապահովագրել էր հենց այս ընկերությունում ու տեղափոխման հետ կապված խնդիրներ են առաջացել։

«Փաստինֆո»-ի հարցմանն ի պատասխան ԶՊՄԿ-ից, ըստ էության, չհերքեցին, որ ապահովագրության հետ կապված խնդիրներ են եղել։ «Բեռնափոխադրումների հետ որևէ խոչընդոտ, արգելք չկա, կան փաստաթղթային գործընթացներ ու խնդիրներ, որոնք լուծման ընթացքի մեջ են»,- հայտնել են ԶՊՄԿ-ից։

Նշենք, որ «Ինգոսստրախ» ապահովագրական ընկերությունը դեռևս 2003-2004թթ. ձեռք է բերել ՀՀ-ում գործող «Ինգո Արմենիա» ապահովագրական կազմակերպության 75 տոկոսը, հետեւապես պատժամիջոցները ազդում են նաեւ այս ընկերության վրա ու արդեն մտահոգություններ ունեն նաեւ ֆիզիկական անձինք, որոնք հենց այս ընկերությունում են ձեռք բերել բժշկական ապահովագրություն ու արտերկիր մեկնելիս վտանգ կա,որ կարող են խնդիրների բախվել, այսինքն՝ արեւմտյան երկիրը չեն ընդունի ապահովագրությունը, եթե հանկարծ նման անհրաժեշտություն առաջանա։

Հենց այդ պատժամիջոցներն են պատճառը նաեւ, որ, օրինակ, ՎՏԲ բանկի հայաստանյան հաճախորդները- քարտապանները չեն կարողանում օգտվել visa համակարգից եւ այն կիրառելի է միայն Հայաստանում՝ գումար կանխիկացնելու համար։

«Փաստինֆո»-ն պատրաստ է հրապարակել «Ինգո Արմենիա» ընկերության պարզաբանումները նշված հարցի վերաբերյալ։

Աղբյուր` Փաստինֆո