Փաստ ինֆո

Մենք մեր ռազմավարության ու քաղաքականության հիմքում դնում ենք պետականությունը, անկախությունն ու ինքնիշխանությունը: Պետք է արձանագրեմ, որ պետությունը բոլորովին ուրիշ մտածողություն է, պետությունը բոլորովին ուրիշ մշակույթ է, պետությունը բոլորովին ուրիշ հայեցակետ է, պետք է մենք ուժ ունենանք խոստովանելու ու առերեսվելու, որ այդ մտածողությունը միշտ չէ ու ամենուր չէ, որ հասանելի է մեզ։ Այս մասին կառավարության այսօրվա նիստում ասաց Նիկոլ Փաշինյանը՝ անդրադառնալով «Հայոց պատմության» առարկային վերանվանմանը «Հայաստանի պատմություն»

Նա ընդգծեց, որ պետք է հանրային կյանքի կենտրոնում դնել պետությունը։ «Մենք, իմ գնահատմամբ, մի պրոսեցի մեջ ենք, որ հիմա փորձում ենք բարձրանալ դեպի պետական ընկալման աշտարակ, որտեղից աշխարհն ու կյանքը երևում է բոլորովին այլ կերպ, սա չափազանց կարևոր պրոցես է»,- ասաց Փաշինյանը՝ ընդգծելով, որ սրա պատճառը մեր բոլորիս ստացած կրթությունից է։

Նա նշեց, որ կրթության համատեքստում պետությունը դրված չէ։ «Հայաստանի պատմությունը» պետության գոյության զարգացման պատմությունն է՝ պետության չգոյության դրվագներով, իսկ «Հայոց պատմությունը» պետության չգոյության պատմությունն է՝ պետության գոյության դրվագներով: «Այն, որ մեզ համար կարևոր է պետության հարատևությունը ապահովելու ռազմավարությունը, նախ դա պետք է տեղի ունենա սոցիալ-հոգեբանական պայմաններում։ Այդ փոփոխությունը տեղի է ունենում այսօր ՀՀ-ում։ վերջին շրջանի իրադարձությունները հենց դա են ցույց տալիս»։

Նա ներկայացրեց Կիրանցում սահմանային սարքավորումների պատկերներին քաղաքացիների արձագանքը։ «Դա «պետության» և «չպետության» տարբերությունը արտահայտող պատկերներ են։ «Պետության» և «չպետության» միջև գոյություն ունեցող այդ ճեղքը և այդ ճեղքում գոյություն ունեցող մտածողությունը, որը, պետք է խոստովանենք, երկար ժամանակ կանխորոշել է մեր իրականությունը, մեր մտածողությունը, կամ էլ մեր մտածողությունն է արտահայտվել այդ իրողության մեջ»։

Փաշինյանի խոսքով՝ պետք է ապահովեն տրանսֆորմացիան Էմոցիաների ժողովրդից դեպի պետության ժողովուրդ։
«Պետք է հանրությանը կարողանանք ներկայացնել ՝ինչ ենք անում և ինչու։ Դրա ձևը երկխոսությունն է։ Մեր բոլոր քաղաքականությունները կարգաբերվում են իրական Հայաստանի տրամաբանությամբ և բոլոր այն քաղաքականություները, մոտեցումները, որոնք հակասում են ՀՀ պետական շահերին՝ դրանք պետք է քայլ-քայլ մղվեն երկրորդ պլան և դուրս թողնվեն մեր իրականությունից»։

Աղբյուր` Փաստինֆո