Փաստ ինֆո

Դատարանը ՀՀԿ փոխնախագահ Արմեն Աշոտյանի կալանքի ժամկետը` երեք ամսով երկարացնելուց հետո կմեկնի արձակուրդ:

Ինչպես արդեն տեղեկացրել ենք` Հակակոռուպցիոն դատարանը` դատավոր Վահե Դոլմազյանի նախագահությամբ, բավարարել է Արմեն Աշոտյանի կալանքի ժամկետը երկարացնելու մասին դատախազի միջնորդությունը` մերժելով պաշտպանների միջնորդությունը` Աշոտյանի նկատմամբ որպես խափանման միջոց տնային կալանքը, 40 մլն դրամի չափով գրավը և անձնական երաշխավորությունն ընտրելու մասին:

Պաշտպաններն ընդգծել են, որ այլընտրանքային խափանման միջոցները բավարար են` գործի քննությանը խոչնդոտելու ռիսկի մասով դատախազի մտահոգությունները փարատելու համար: Ավելին, առաջարկվող գրավի չափը գերազանցում է քրեական գործով` ենթադրյալ պատճառված վնասի չափին:

Դատական նիստի ընթացքում Արմեն Աշոտյանը հայտարարել էր, որ իր պայքարը ու, նույնիսկ, իր կալանավորումը երբեք անձնական չի համարում։

«Իմ պայքարը բացարձակ անձնական չէ, հետևաբար, դրան հետևած կալանքը ևս անձնական չեմ դիտում։ Այս 400 օրը, որ գտնվում եմ կալանքի մեջ, ոչ թե իմ անձնական կալանքի օրերն են, այլ՝ Արցախի կորստի, Արցախի հայաթափման, Տավուշի 4 գյուղերի հանձնման օրեր էին։ Երկիրն ապրում է այլ կարևոր երևույթներով։ Բոլոր դժվարություններով հանդերձ՝ իմ և իմ ընտանիքի անձնական պատմություններն իրականում խամրում են այն ամենի համեմատ, ինչ տեղի է ունեցել և տեղի է ունենում մեր երկրում։

Ես գոնե հայկական բանտում եմ նստած, Արցախի ղեկավարությունը՝ ադրբեջանական. իմ պատմությունը նրանց մոտ խամրում է։

Իմ էրեխեքը էս պահին զրկված են հորից, բայց ես, գոնե, բանտում եմ, ոչ թե՝ գերեզմանոցում, ինչպես պատերազմի հետևանքով շատերը։ Ես կտրված եմ տնից, բայց, փառք Աստծո, այնտեղ ուրիշ մարդ չի բնակվում։ Որքան էլ դժվար է իմ ու իմ ընտանիքի համար, այս ամենը խամրում է ողբերգական խնդիրներ ունեցող հարյուր հազարավոր իմ հայրենակիցների կողքին»,- ասել էր Աշոտյանը։

Խափանման միջոցի հարցի լուծումից հետո դատարանը որոշեց մեկ ամսով հետաձգել դատական նիստը` մինչև օգոստոսի 15-ն, ժամը` 13:00-ն: Նախագահողը հայտնեց, որ հուլիսի 22-ից գտնվելու է ամենամյա արձակուրդում:

Դատական ն իստը մեկ ամսով հետաձգելու որոշման դեմ առարկեցին պաշտպան Ռուբեն Մելիքյանը և Արմեն Աշոտյանը: Վերջինս նշեց, որ քիչ առաջ դատարանը երեք ամսով երկարացրել է իր կալանքի ժամկետը` նշելով, որ ոչինչ չի փոխվել, բայց ինչպես պետք է փոխվի, եթե նիստը մեկ ամսով հետաձգվում է, հետո պետք է հոկտեմբերին նիստ հրավիրեն, կալանք երկարացնեն նշելով, որ ոչինչ չի փոխվել: Կողմի առարկելուց հետո նախագահողը նշեց, որ հնարավոր կլինի հաջորդ շաբաթ նիստ անցկացնել, հաջորդ նիստը նշանակվեց հուլիսի 18-ին:

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո