Փաստ ինֆո

Իրանի արտաքին քաղաքական կյանքը որոշվում է ոչ թե Իրանի նախագահական ապարատում, այլ հոգևոր առաջնորդի գրասենյակում ու այլ կառույցներում։ Գծվում է որոշակի շրջանակ և նախագահին ու իր կառավարությանը տրվում է լիազորություններ և նրանք այդ շրջանակներում ունեն որոշակի մանևրելու տեղեր։ Իհարկե, որոշակի կոսմետիկ փոփոխություններ կլինեն՝ կապված պահպանողական և բարեփոխական թևերի փոփոխությունների հետ, սակայն գլոբալ առումով Իրանի արտաքին քաղաքականությունում հազիվ թե կտրուկ փոփոխություններ լինեն։ «ՓաստԻնֆոյի» եթերում ասել է իրանագետ, ԵՊՀ իրանագիտության ամբիոնի դասախոս Ահարոն Վարդանյանը։

Բանախոսի դիտարկմամբ, Մ․ Փեզեշքիանի ծագման հետ կապված կա որոշակի քարոզչություն և այդ քարոզչությունը գալիս է ադրբեջանական հանրապետությունից։ Սակայն երբևէ կարևոր չի եղել նախագահի կամ այլ քաղաքական գործչի էթնիկ պատկանելիությունը։ Այստեղ բոլորը իրենց դիտարկում և ընկալում են որպես իրանցիներ և դա է կարևոր։ Իրանում չի կարող լինել որևէ նախագահ կամ պաշտոնական այր, որը կվարի ոչ թե պրոիրանական, այլ պրոադրբեջանական կամ պրոթուրքական քաղաքականություն։

Անդրադառնալով Իրանի «Կարմիր գծերին», բանախոսը նշեց, որ «Կարմիր գիծ»-ը սահմանվել է հոգևոր առաջնորդի կողմից և Իրանում հազիվ թե գտնվի մեկը, որը կփորձի հոգևոր առաջնորդի սահմանած կարմիր գիծը խախտել։ Բացի այդ, եթե Իրանում փորձեն որոշակի զիջումների գնալ այլ հարցերում, ապա Իրանը Արևմուտքի հետ բանակցություններում հազիվ թե հաջողության հասնի։ Իրանը հաջողության է հասնում այն պարզ պատճառով, որ կարողանում է իր «Կարմիր գծերը» պահել և շատ լավ օգտագործել բանակցությունների ընթացքում։ Եթե Իրանը, լինի դա «Զանգեզուրի միջանցք»-ի թե այլ խնդիր, որոշակիորեն հետ քաշվի, ապա Արևմուտքի հետ բանակցությունները ոչ թե հաջողությամբ կսպակվեն, այլ, ընդհակառակը։

Իրանագետը նշում է, որ Իրանը ռազմավարական և տնտեսական կարևորության խնդիրները երբեք չի դրել մեկ նժարի վրա։ Նա դրանք համահավասար հարթության վրա է տանում և շատ լավ հասկանում է, որ տնտեսությունը նույնպես ռազմավարական խնդիրներ լուծելու միջոց է։ Դժվար թե Իրանը տնտեսական դիվիդենտների համար զիջի իր դիրքերը «Զանգեզուրի միջանցք»-ի կամ այլ միջանցքների հարցում, քանի որ դա դիտարկում են ոչ թե որպես «Զանգեզուրի միջանցք», այլ «թուրանական միջանցք»։

Մանրամասները՝ տեսանյութում։

Աղբյուր` Փաստինֆո