Փաստ ինֆո

Հունգարիայի վարչապետ Վիկտոր Օրբանի մասնակցությունը Շուշիում կայացած թուքարլեզու երկրների գագաթնաժողովին լուրջ սկանդալ է առաջացրել ԵՄ-ում և շատ պատգամավորներ հարց են բարձրացնում, թե արդյոք նա իրավունք ուներ մասնակցելու այս գագաթնաժողովին, որովհետև Օրբանը զուտ Հունգարիայի վարչապետը չէր, այլ հանդիսանում է ԵՄ խորհրդի նախագահ։ «Փաստինֆո»-ի եթերում ասել է միջազգայնագետ Գրիգոր Բալասանյանը։

Նա ուշադրություն է հրավիրել այն փաստի վրա, որ Օրբանը Շուշիում հայտարարել է, թե Ադրբեջանը շատ կարեւոր գործընկեր է, հիացած է Իլհամ Ալիևով, գովել նրան Արցախը զավթելու հետ կապված։ «Հիմա այստեղ հարց է առաջանում, մոտավորապես նման բովանդակությամբ խոսակցություն եղավ նաև Լուկաշենկոյի՝ Շուշի կատարած այցի ժամանակ , ինչից հետո Հայաստանում հայտարարեցին, որ քանի դեռ Լուկաշենկոն Բելառուսի նախագահն է ՀՀ պաշտոնական որեւէ պատվիրակություն չի մեկնի Բելոռուս։ Հիմա՝ քանի դեռ Հունգարիան ԵՄ նախագահող երկիր է, Հայաստանը պաշտոնական պատվիրակություններ ուղարկելո՞ւ է Բրյուսել, թե ոչ»,- ասել է Գ. Բալասանյանը՝ ավելացնելով, որ Օրբանը միայն որպես Հունգարիայի վարչապետ չէ, որ մեկնել է Շուշի։

Ավելին, Հունգարիայի վարչպաետը մինչեւ ԵՄ խորհրդի նախագահող երկիր դառնալը հնարավորություն ուներ այցելելու Շուշի , Պեկին, Մոսկվա, սակայն չի օգտվում այդ հնարավորությունից։ «Սա չի՞ նշանակում արդյոք, որ Օրբանը ԵՄ-ի կողմից դիտարկվում է թուրքական աշխարհի հետ գաղտնի դիվանագիտություն վարող և, առհասարակ, ԵՄ-ի համար գաղտնի դիվանագիտություն իրականացնող անձ։ Եվ եթե թուրքական աշխարհը ԵՄ-ի համար գաղտնի դիվանագիտական ուղիներից մեկն է՝ ՌԴ-ի, Չինաստանի հետ հարաբերությունները կարգավորելուհամար, ապա այս պարագայում հարց է առաջանում, թե արդյո՞ք ԵՄ-ն կարող է անաչառ միջնորդ լինել՝ հայ-ադրբեջանական հարաբերություններում։ Կարծում ենք, որ ոչ»,- նշել է միջազգայնագետը։

Աղբյուր` Փաստինֆո