Փաստ ինֆո

Իրանի նորընտիր նախագահ Մասուդ Փեզեշքիանի թրքամետության վերաբերյալ ինֆորմացիան պետք է չէ այդպես միանշանակ ընկալել։ Նա անգամ ցանկության դեպքում չի կարող հակառակվել Իրանի հոգեւոր առաջնորդին։ «Փաստինֆո»-ի հետ զրույցում ասաց իրանագետ Գարիկ Միսակյանը։ Ինչպես արդեն հայտնել ենք՝ Իրանում հուլիսի 5-ին կայացած նախագահական ընտրությունների երկորդ փուլի արդյունքներով Իսլամական Հանրապետության նախագահ է ընտրվել բարեփոխական Մասուդ Փեզեշքիանը։

Այս գործիչը նախկին հանդես է եկել որոշ պրոթուրքական հայտարարություններով, ավելի ճիշտ, ինչպես նկատեց իրանագետ Միսակյանը, արցախյան պատերազմի ժամանակ ոչ այնքան հայանպաստ հայտարարություններով, սակայն այդ ընթացքում եղել է պատգամավոր եւ խոսել է պոպուլիստական քաղաքականության տեսանկյունից։

Գարիկ Միսակյանի արձանագրմամբ՝ նախընտրական քարոզարշավի ժամանակ եւս խոսել է Թուրքիայի տնտեսության մասին, բայց նախագահի պաշտոնը ստանձնելուց հետո, նրա կարծիքով, չի կարող թրքամետ դիրքորոշում ընտրել՝ ի հակառակ հոգևոր առաջնորդի։ Ավելին, չի կարող նաև արտաքին քաղաքական վեկտորում այդքան հակառակվել հոգևոր առաջնորդին։

«Եթե խոսենք Հայաստանի հետ հարաբերություններում փոփոխությունների մասին, ապա դրանք նույնպես հնարավոր են միայն բարձր ղեկավարության որոշման դեպքում, այդ թվում՝ հոգևոր առաջնորդի և նրա գրասենյակի։ Եթե նույնիսկ Մասուդ Փեզեշքիանը որոշակի ցանկություն ունենա, ապա չի կարող հակադրվել հոգևոր առաջնորդին», - վստահեցրեց իրանագետը։
Հայկական և ադրբեջանական մեդիատիրույթում հրապարակումներ, շահարկումներ են եղել նրա ծագման վերաբերյալ, ինչպես Միսակյանը նշեց, եղել է սխալ տերմինալոգիայով ներկայացում։ Հարցն այն է, որ ատրպատականյան թյուրքախոսներին ներկայացրել են որպես ադրբեջանցիներ, բայց խոսել միանշանակ պրոադրբեջանական և հակահայ դիքորոշման վերաբերյալ, դա, իրանագետի կարծիքով, այս փուլում բավականին սխալ է։

«Սպասենք երդմնակալության արարողությանը և դրանից հետո հնչող հայտարարություններին, բայց, կարծում եմ, Իրանի կողմից ռադիկալ փոփոխություն Հայաստանի հետ հարաբերություններում չի լինի», - ասաց Գարիկ Միսակյանը։

Իրանագետն առաջարկեց սպասել նաեւ ԱՄՆ-ի ընտրությունների ավարտին։ «Հնարավոր են որոշակի գլոբալ փոփոխություններ՝ Իրանի արտաքին քաղաքական վեկտորում, եթե դա թույլ տա հոգևոր առաջնորդը, օրինակ՝ արևմուտքի հետ բանակցությունների վերսկսում։ Կարծում եմ և՛ Իրանի հոգևոր առաջնորդը, և՛ Փեզեշքիանը սպասելու են ԱՄՆ-ի ընտրությունների արդյունքներին, որպեսզի արտաքին քաղաքականության վեկտորում հստակություն մտցնեն։Եթե ընտրվի Թրամփը, ապա Իրանն այլ քաղաքականություն կվարի, եթե ընտվի Բայդենը՝ այլ», - եզրակացրեց իրանագետը։
Ինչ վերաբերում է արտաքին քաղաքականության հարցերում Իրանի նորընտիր նախագահի եւ հոգեւոր առաջնորդի միջեւ հնարավոր տարաձայնություններին ու այդ համատեքստում ներքաղաքական կյանքում լարվածության առաջացմանը, ապա իրանագետը նման զարգացումներն Իրանում հավանական չի համարում։

Նրա արձանագրմամբ՝ Իրանի նորընտիր նախագահի ընրտազանգվածն այլ է, նրան չեն ընտրել Իրանում որոշակի բարեփոխումների համար պայքարող մարդիկ։

Աղբյուր` Փաստինֆո