Փաստ ինֆո

ԱՄՆ սենատորի Հայաստանից երրորդ պետությանը՝ Ադրբեջանին ուղղված ուղերձը նշանակում է չհարգել Հայաստան պետությունը։ Եթե իրենք Ադրբեջանին բան ունեն ասելու՝ կոռեկտ կլինի և քաղաքականապես ճիշտ, որ ասեն հենց Ադրբեջանում։ Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցը։ Նշենք, որ ԱՄՆ սենատոր Ռոջեր Ուիքերն այսօր Երեւանում հայտարարել է, թե ուղերձ ունի ուղղված Ադրբեջանին՝ «զգուշացե'ք, որ «ռուսական մեծ արջը» չփորձի գերակայող դիրք զբաղեցնել»։

«Ես չեմ հիշում ամերիկյան որևէ պատվիրակություն, որ գնացել է Ադրբեջան և որևէ պաշտոնյայի հետ հանդիպելիս որևէ հայտարարություն է արել, որովհետև Հայաստանի տարածքն օգտագործել երրորդ երկրների հետ հարաբերություններ շոշափելու առումով՝ նշանակում է չհարգել մեր պետությանը, նշանակում է ավելորդ լարվածություն ստեղծել Հայաստանի շուրջ։ Ավելի կոռեկտ կլիներ, եթե իրենք ասեն, թե ինչ կարող են անել Հայաստանում խաղաղություն հաստատելու համար, ինչ կարող են անել՝ Ադրբեջանին զսպելու համար»։

Հարցին, թե հակասություն չի՞ տեսնում այս հայտարարության և ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայեն հայտարարության միջև, ըստ որի՝ Ադրբեջանը իրենց կարևոր գործընկեր է և, որ Ադրբեջանով և Հայաստանով ճանապարհի բացումը ԱՄՆ-ի համար կարևոր է՝ քաղաքագետն ասաց, որ փաստացի ստացվում է, որ իրենք Ադրբեջանում կարևորում են Ադրբեջանի դիրակատարությունը, իսկ Հայաստանում անում են հակառուսական հայտարարություններ, սա լուրջ չի և խոսում է Հայաստանի իշխանության որակի մասին։

«Մեզ հետ կարող են քննարկել երկկողմ ու տարածաշրջանային կարևորության հարցեր, բայց Հայաստանը չպետք է դառնա հարթակ, որ ով ասես՝ գա ու հակառուսական կամ որևէ այլ երրորդ երկրի դեմ հայտարարություններ անի ու գնա»։

Հարցին, թե այդ դեպքում ո՞ւմ էր ուղղված այս հայտարարությունը՝ ամելի շատ Ադրբեջանին, թե Ռուսաստանին՝ նա ընդգծեց, որ ամենայն հարգանքով սենատորի ինստիտուտի հանդեպ՝ այս ինստիտուտը այնքան ազդեցիկ չէ, որ նրանց հայտարարություններին Մոսկվայում կամ Բաքվում լուրջ արձագանքեն։ «Ամեն դեպքում՝ սա պաշտոնական ԱՄՆ-ի տեսակետ չէ»։

Աղբյուր` Փաստինֆո