Փաստ ինֆո

Գվատեմալայից մի աղջիկ ասթմայի նոպայից հետո կոմայի մեջ է ընկել ու դրանից դուրս գալով՝ պատմել, թե ինչպես է իբր Աստծո հետ նստել մի սեղանի շուրջ։ Այս մասին հայտնում է The Sun-ը։

24-ամյա Մարիանդրե Կարդենասը տնից աշխատում էր, երբ սկսել է շնչաեղձություն զգալ: Նա հասցրել է գրել մորն ու եղբորը՝ գիտակցությունը կորցնելուց առաջ։ Պատճառը խրոնիկ ասթման էր, որով Կարդենասը տառապում էր մանկուց։ Աղջկան հոսպիտալացրել են, միացրել են արհեստական շնչառության սարքին և մտցել արհեստական կոմայի մեջ, քանի որ բժիշկները կարծում էին, որ այս կերպ նա ողջ մնալու ավելի մեծ հնարավորություն ունի:

Կարդենասը ասել է, որ վերջին բանը, որ լսել է, այն էր, որ բուժքույրն ասաց. «Նա թողեց մեզ»:

Հետո, աղջկա պատմելով, իբր ինքը հայտնվել է ինչ-որ ոչերկրային հարթության մեջ, որը նա դրախտ է համարում:

«Ես լույսով լի վայրում էի, բայց առանց արևի, առանց լուսնի, առանց աստղերի: Ես նստած էի երկար սեղանի մոտ՝ լի ուտելիքով, որը երբեք չէի տեսել, լի մարդկանցով, որոնք մարդկային մարմին չունեին, բայց լույսի էակներ էին։ Ոչ ոք իրար հետ ձայնով չէր խոսում, ամեն մեկն իր մտքի օգնությամբ շփվում էր։ Ես չէի հիշում իմ անցյալ կյանքը, ոչ իմ ընտանիքը, ոչ էլ Երկիրը. ինձ համար այդ ամենից զատ ոչ մեկը երբևէ գոյություն չէր ունեցել: Ես մեծագույն սեր էի զգում լույսի այս բոլոր էակների հանդեպ, զգում էի, որ նրանք բոլորն իմ մասնիկն են, և ես նրանց մի մասն էի»,- ասել է Կարդենասը:

Աղջիկը նաև պատմել է,  որ այստեղ նա տեսել է Աստծուն, ով նստել էր սեղանի մոտ հենց իր դիմաց։

«Ես գիտեմ, որ դա Աստված էր, քանի որ նա ամենամեծ լույսն էր, նա լուսավորեց ամեն ինչ շուրջը: Ես չտեսա նրա դեմքը, բայց ես գիտեի, որ նա ծիծաղում է», - նկարագրել է Կարդենասը նրանց հանդիպումը:

Աստված խոսել է Կարդենասի հետ ու ասել, որ ժամանակն է, որ նա վերադառնա: Աղջկան դա շատ է տխրեցրել, բայց Աստված բացատրել է, որ պետք է վերադառնա «հանուն սիրո» ու ավելացրել է, որ նրանք նորից կհանդիպեն, երբ գա նրա ժամանակը:

Աղբյուր` Փաստինֆո