Փաստ ինֆո

Հայաստանն ավելի բացահայտ է դարձնում դեպի Արևմուտք իր արտաքին-քաղաքական վեկտորի փոփոխությունը և Հայաստանը Արևմուտքի հովանու ներքո զետեղելու քաղաքականությունը։ Այս իշխանությունների պարագայում տեսել ենք դեպի ՆԱՏՕ և Արմուտք շրջադարձ։ Այս պահի դրությամբ Արևմուտքը արդեն սկսել է ճեղքեր ու ճաքեր գրանցել և կորցնում է իր աշխարհաքաղաքական կշիռը թե՛ որպես քաղաքական, թե՛ որպես ֆինանսական, և թե՛ որպես անվտանգային կենտրոնի։ «ՓաստԻնֆոյի» եթերում ասել է արտակարգ և լիազոր դեսպան Ձյունիկ Աղաջանյանը։

Բանախոսի դիտարկմամբ՝ ԵՄ-ին անդամակցության հանրաքվեի առնչությամբ Ն․ Փաշինյանի և ՔՊ պաշտոնյաների թվացյալ անհամաձայնությունները պահի դրությամբ ավելի թելադրված են անկայուն ներքաղաքական իրավիճակով, որը հղի է արևմտյան գործող իշխանությունների փոփոխություններով, երբ առավել ազգային ուժերը տարբեր երկրներում ստացան ձայների առավելագույն մասը՝ ի հակակշիռ գործող իշխանությունների։ Այս անսպասելի զարգացումները մեր իշխանությունների հապաղելու պատճառ դարձան և ժեստեր դեպի ռուսական կողմ՝ իբրև թե հարաբերությունները լավացնելու։ Սա ժամանակավոր կեցվածք է, որը խնդիրները առկախելու նպատակ է հետապնդում։

Ըստ բանախոսի, Ալիևը աշխարհաքաղաքական ծրագրի մասնակից է դարձել՝ նվեր ստանալով Արցախը, բայց դրան ի պատասխան պետք է գործողություններ իրականացնի, որոնք ենթադրում են ռազմական գործողությունների սկսում Իրանի հյուսիսային հատվածում, այսինքն Արցախի օկուպացված տարածքներում։ Այս գործողությունները պետք է սկսվեն խաղաղության պայմանագրի ստորագրումից, Թուրքիայի հետ սահմանի բացումից և միջանցքի բացումից հետո։ Այսինքն, այդ պայմանագրի ստորագրումը այն կետն է, որից սկսելու է համաձայնությունների հաջորդ գլխի իրականացումը։

«Ադրբեջանը ներկայիս աշխարհաքաղաքական փոփոխությունների պարագայում շատ լավ հասկանում է, որ ոչ ոք չի կարող իրեն երաշխավորել ռազմական գործողությունների սկսելու դեպքում իր պետության և իր իշխանության անխաթար մնալը։ Դրանից խուսափելու համար նա անընդհատ պայմաններ է ներկայացնում։ Կարող ենք եզրակացնել, որ ամեն ջանք գործադրում է՝ ձգձգելու այդ գործընթացը»,- ասել է Ձ․ Աղաջանյանը։
Մանրամասները՝ տեսանյութում։

Աղբյուր` Փաստինֆո