Փաստ ինֆո

Հայաստանի ու Ադրբեջանի միջեւ բանակցային գործընթացը, կարծես թե, կանգ է առել, այնպիսի տպավորություն է, որ Ալիևն առաջ է քաշել իր պահանաջներն ու հիմա սպասում է հայկական կողմի պատասխանին։ «Փաստինֆո»-ի եթերում ասել է միջազգայնագետ Գրիգոր Բալասանյանը։

Նրա արձանագրմամբ՝ Ադրբեջանը վերջին շրջանում արևմուտքի համար կարևոր գործընկեր է դարձել առ այն, որ անգամ ՆԱՏՕ -ի շտաբ -կայանում նշում են ադրբեջանական զինված ուժերի ստեղծման 106- ամյակը։

Փորձագետը ուշադրություն է հրավիրել նաեւ Կանադայի նորանշանակ դեսպանի հետ հանդիպման ժամանակ Ադրբեջանի նախագահի մի քանի հայտարարությունների վրա։ Ըստ ադրբեջանական ԶԼՄ-ների՝ խոսվել է տարածաշրջանում կայունության ապահովման, պայմանագրի ստորագրման մասին և Ադրբեջանի ղեկավարը խաղաղության պայմանագրի ստորագրումը կապել է Հայաստանի սահմանադրական փոփոխությունների հետ։ Ավելին՝ խոսել է նաեւ ադրբեջանցիների վերադարձի մասին, բայց ոչ թե ներկայացրել է Հայաստանից գնացած ադրբեջանցիների, այլ՝ «Արևմտյան Ադրբեջան» վերադառնալու ենթադրյալ «պատմական իրավունքի» մասին։ «Ալիևը գոյություն չունեցող այդ իրավունքը հավասարեցրել է արցախցիների Արցախ վերադառնալու իրավունքի։ Նա նաև ասել է, որ այս ամենը հայելային պետք է լինի և դրա փոխարեն ադրբեջանցիները պետք է վերադառնան այսպես կոչված «Արևմտյան Ադրբեջան», սակայն Ադրբեջանի ղեկավարը չի նշել, որ եթե խոսքը գնում է հայելային վերադարձի մասին, ապա պետք է բարձրացվի նաև Ադրբեջան շուրջ 500 հազար հայերի վերադարձի հարցը , ովքեր բռնի տեղահանվել են՝ ենթարկվելով սպանդի, կոտորածների ու բռնաճնշումների, կորցնելով իրենց ունեցվածքը ի տարբերություն ադրբեջանցինեի, որոնք հնարավորություն են ստացել վաճառելու իրենց գույք կամ փոխանակել և գրեթե անվնաս հեռանալ Հայաստանից։ «Սա պետք է նաև մեր ԱԳՆ ուշադրության ներքո լինի և Կանադայի դեսպանը պետք է կանչվի ԱԳՆ , որտեղ նրան մանրամասն պետք է ներկայացվի, թե ինչպես են տեղի ունեցել 1988-91 թթ. Իրադարձությունները, թե ինչպես են հայերին ջարդել Սումգայիթում, Բաքվում, եւ ինչպես ադրբեջանցիներին չեն ջարդել Հայաստանում։ Բացի այդ, ըստ լրատվության, Ալիևը առաջ է քաշել նաև այդ ադրբեջանցիների ֆիզիկական ապահովության խնդիրը՝ նշելով, որ այդ տարածքներում պետք է տեղակայվեն զինված ուժեր, որոնք դաշնակից են Ադրբեջանին, կամ որոնց նկատմամբ Ադրբեջանն ունի վստահություն, իսկ դրանք թուրքական ուժերն են։ Սա շատ վտանգավոր հայտարարություն է»,- արձանագրել է միջազգայնագետը։

Մանրամասները՝ տեսանյութում։

Աղբյուր` Փաստինֆո