Փաստ ինֆո

Փաստաբան Զարուհի Փոստանջյանը պահանջում է քրեական պատասխանատվության ենթարկել և արտոնագրից զրկել Նիկոլ Փաշինյանի փաստաբանին ՝ Արման Ներսիսյանին։ Վերջինս էլ պահանջում է պատասխանատվության ենթարկել Փոստանջյանին՝ իրեն հոգեբանորեն ճնշելու և այդպիսով փաստաբանի օրինական գործունեությանը խոչընդոտելու համար։

Միջադեպը տեղի է ունեցել երեկ՝ Երևանի ընդհանուր իրավասության քաղաքացիական դատարանի բակում՝ «Նիկոլ Փաշինյանն ընդդեմ Զարուհի Փոստանջյանի» գործով դատական նիստից հետո։ Նշված հայցը, հիշեցնենք, ներկայացվել էր դեռևս 2021թ․։ Դատարանը որոշել էր մի մասով բավարարել հայցապահանջը՝ պարտավորեցնելով Զարուհի Փոստանջյանին հերքում տարածել՝ 5000 տպաքանակ ունեցող օրաթերթում, ինչը, սակայն, չի իրականացվել, Զարուհի Փոստանջյանի պնդմամբ՝ դրա անհնարինության պատճառով, քանի որ ՀՀ-ում այլևս 5000 տպաքանակ ունեցող թերթ չկա․ «Նիկոլ Փաշինյանն անցյալ տարի նույնիսկ Հայաստանի Հանրապետություն թերթն է փակել, այդ թվում՝ իր այդ՝ «Թուրքական ժամանակը»»,- մեզ հետ զրույցում ասաց Փոստանջյանը։ Դատական ակտը չկատարելու վերաբերյալ գործով այժմ քրեական հետապնդում է իրականացվում Փոստանջյանի նկատմամբ, նրա գնահատմամբ՝ «Նիկոլ Փաշինյանի նախաձեռնությամբ»։ Հայցադիմումը՝ փոխհատուցման պահանջի մասով մերժվել էր, ինչը բոլոր ատյաններում բողոքարկման արդյունքում կրկին քննարկման առարկա է դարձվում առաջին ատյանի դատարանում, այս անգամ՝ Նիկոլ Փաշինյանի նոր փաստաբանի ներգրավմամբ։ Հենց այս գործով նիստից հետո էլ տեղի է ունեցել միջադեպը։

Զարուհի Փոստանջյանը «Փաստինֆո»-ի հետ զրույցում ասաց, որ նախկինում Նիկոլ Փաշինյանի շահերը ներկայացնում էր այլ փաստաբան, որն առավել զուսպ էր պահում իրեն, արտառոց վարքագիծ չուներ։

«Նախնական նիստի գործընթաց է տեղի ունենում, նիստն ավարտվեց, դուրս ենք եկել արդեն դատարանի դահլիճից, բարձրացանք, աստիճաններով, որ արդեն դուրս ենք գալիս, իրեն շատ ագրեսիվ էր պահում, ինչ-որ բառեր էր ասում՝ իրեն նույնականացնելով Նիկոլ Փաշինյանի հետ, կարծես ինքն էր վիրավորվում, զրպարտվում Նիկոլ Փաշինյանի փոխարեն։ Խոսելիս ասացի, որ եթե այդպես է, նկարեմ, որ ցույց տամ՝ ով է Նիկոլ Փաշինյանի փաստաբանը, այդ պահին, որ արդեն ուզում էի հեռախոսով նկարել, ձեռքիցս քաշեց հեռախոսս, վերցրեց, ձեռքս՝ վնասվեց, հեռախոսս բավականին՝ մի քանի րոպե պահեց իր մոտ, հետո՝ տվեց կարգադրիչներից մեկին։ Ասացի՝ սպասիր, զանգում եմ ոստիկանություն, հաղորդում՝ ներկայացնեմ։ Չսպասեց, նստեց մեքենան և դիմեց փախուստի»,- երեկ տեղի ունեցած դեպքից մանրամասներ հայտնելով ասաց Զարուհի Փոստանջյանը՝ տեղեկացնելով, որ Նիկոլ Փաշինյանի փաստաբանը նաև հայտնել էր, որ ինքն է պատրաստվում հանցագործության մասին հաղորդում ներկայացնել՝ հանրային վայրում իր անձնական տվյալի իբրև հավաքագրման համար։ Փոստանջյանը հայտնեց, որ և՛ հանցագործության մասին հաղորդում է ներկայացրել, և՛ գրավոր բողոքով դիմել է փաստաբանների պալատին՝ պահանջելով զրկել նրան արտոնագրից։ Փոստանջյանը կասկածում է, որ քրեական վարույթ նախաձեռնվի։ Նշենք, որ մեր զրուցակիցը ֆեյսբուքյան էջում հրապարակել է նաև տեսանյութ՝ հեռախոսը խլելու հետևանքով ցուցամատի կապտուկի մասին։ Հաղորդումը Փոստանջյանը ներկայացրել է Զեյթունի բաժնում՝ փոխանցլով այն ոստիկաններին, սպասել է, սակայն առ այս պահը որևէ նորություն չունի՝ վարույթի նախաձեռնման մասին։

«Ինչքան կարելի է հայ ազգին այսպես ծաղրել, գիտեք՝ այսքան տառապանքից հետո, շարունակել ցեղասպանների՝ իշխանությունների պահելը սարսափելի է, բնականոն ընթացք կարծես լինի, բոլորս արդեն սովորել ենք, որ ապօրինությունները համընդհանուր բնույթ են կրում, սա ինչ է, եթե իրենք տարան 5000 երեխայի գլուխը կերան, պետությունը վերացրեցին, Արցախը հանձնեցին։ Տվյալ անձը համարձակվել էր Նիկոլի իրավունքները, լիազորագիր էր ստացել Նիկոլ Փաշինյանից, պատրաստ էր պնդել՝ հայցն իմ դեմ, բայց պատրաստ չէր, որ ինքը պետք է հրապարակավ հայտնի լինի՝ որպես Նիկոլ Փաշինյանի փաստաբանը, դրան պատրաստ չէր, այսինքն՝ լուսանկարի խնդիրը տեսավ, որովհետև դրան պատրաստ չէր։ Այսինքն՝ կարծում են, որ կարող են ծածուկ լինել Փաշինյանի կողմնակիցը, բայց դրա մասին ոչ ոք չիմանա, այդպես չի լինելու։ Կոմպլեքսավորվում են։ Ի՞նչ եմ ասել։ Այս անձին Գրիգոր Մինասյանի և Կարեն Անդրեասյանի ընկերություններ է ընտրել, որ ներկայացնի Նիկոլի իրավունքները։ Ես ասել եմ, որ Նիկոլը գործակալ է, պայմանավորվածությունների ներքո, վարձատրության ներքո հանձնել են մեր հողերը, հայրենիքը, նրան նախորդ իշխանություններն են բերել Խորհրդարան։ Հանրահայտ փաստեր են, անգամ՝ վիճարկման ենթակա չէ, բոլորն են այդ մասին խոսում, ինքն անգամ ասում է, որ թուրք բառից չի վիրավորվում»,- ասաց Զարուհի Փոստանջյանը՝ նշելով, որ բոլորը հաշվվում են՝ ապագայի համար․ «Այնպես չէ, որ երիտթուրքերի կառավարությունը պատասխանատվության չի ենթարկվելու, իհարկե բավականին երկար տևեց։ Ինչքան ավել են մնալու, այնքան՝ ցեղասպանությունը և հայրենազրկումը շարունակվելու է»։

Տեղի ունեցած միջադեպի մասին այլ դիրքորոշում ունի մյուս կողմը՝ փաստաբան Արման Ներսիսյանը, որը ևս հանցագործության մասին հաղորդում է ներկայացրել՝ բարձրացնելով Փոստանջյանին պատասխանատվության ենթարկելու հարցը։ Ներսիսյանը «Փաստինֆո»-ի հետ զրույցում պատմեց, որ դեռևս նիստերի դահլիճում վիրավորական արտահայտություններ են հնչել իր վստահորդի՝ Նիկոլ Փաշինյանի, և «Քաղաքացիական պայմանագիր» կուսակցության հասցեին, իսկ ինքը, տեսնելով, որ այլ քաղաքացիներ ևս կան, խնդրել է լռել, սակայն Փոստանջյանն իբրև չի ենթարկվել իր հորդորներին, խնդրանքներին, շարունակել է վիրավորական արտահայտություններ անել։ Ներսիսյանի խոսքով՝ երբ դուրս է եկել, որ հեռանա՝ Փոստանջյանն իրեն մեղադրում էր, թե ինչու է պաշտպանում Նիկոլ Փաշինյանին, իսկ երբ ինքը հորդորել է իր նկատմամբ ներգործություն չունենալ, Փոստանջյանը հանել է հեռախոսը․ «Սկսել է ահաբեկել, թե նկարելու է՝ խայտառակելու»։

Փաստաբանը պնդեց, թե ինքը որևէ բռնություն չի գործադրել, մատին չի կպել, պարզապես՝ փորձել է ձեռքով ծածկել հեռախոսը, որ իրեն չլուսանկարեն։ Վնասվածք հասցնելու վերաբերյալ պնդումները, ըստ Ներսիսյանի, խեղաթյուրված է, ինքն ունի ձայնագրություններ, որում լսվում է, թե ինչպես է դատական նիստից հետո իրեն վիրավորում։ Ըստ նրա՝ Փոստանջյանի մատը վնասվել է պատահաբար, երբ հեռախոսը փորձել է չեզոքացնել՝ իր իրավունքների պաշտպանության համար, քանի որ իր լուսանկարը անձնական տվյալ է, կենսաչափական տեղեկատվություն է պարունակում, որը չի կարող հայտնվել հեռախոսում՝ առանց իր համաձայնությանբ։ Դիտարկմանը, որ Զարուհի Փոստանջյանի հեռախոսը, որն ինքը վերցրել էր, ևս անձնական տվյալներ է պարունակում, փաստաբանն արձագանքեց՝ ինքը հեռախոսի պարունակությունը չի դիտել։ Ինչ վերաբերում է հանրային վայրում գտնվելու հանգամանքին, ապա փաստաբանի դիտարկմամբ՝ դեպքը տեղի չի ունեցել հանրային վայրում, այլ՝ դատարանից դուրս և ինքն իր մասնագիտական գործառույթներն իրականացնելուց հետո արդեն որպես մասնավոր անձ էր հանդես եկել։ Ըստ նրա՝ Զարուհի Փոստանջյանն իրեն սադրել է, հետևաբար, գտնում է, որ դիտավորյալ է ամեն ինչ արել՝ սկանդալի համար։

Փաստաբան Արման Ներսիսյանը հանցագործության մասին հաղորդում է ներկայացրել՝ պահանջելով քրեական վարույթ նախաձեռնել փաստաբանի մասնագիտական գործունեությանը խոչընդոտելու հատկանիշներով, քանի որ իր նկատմամբ ճնշում է գործադրվել հոգեբանորեն։

Հեղինակ՝ Իզաբել Սահակյան

Աղբյուր` Փաստինֆո