Փաստ ինֆո

Իրանում նախագահական ընտրություններին 6 թեկնածու էր մասնակցում, ընտրությունների նախօրեին երկուսը ինքնաբացարկ հայտարարեցին՝ որպես պահպանողական թևի ներկայացուցիչ և բուն ընտրություններին մասնակցեցին 4 թեկնածու, որոնցից մեկը՝ Մասուդ Փեզեշկյանը բարեփոխական թևի ներկայացուցիչն է, իսկ մյուս 3-ը՝ պահպանողական են։

Այսպիսով՝ ստացվում է, որ պահպանողականները կիսեցին ձայները, որոնք միավորելու դեպքում կարող էին առաջին փուլում հաղթել։ Այս մասին «Փաստինֆոյի» հետ զրույցում ասաց ՀՀ ԳԱԱ Իրանի բաժնի վարիչ, պատմական գիտությունների թեկնածու, դոցենտ Գոհար Իսկանդարյանը։

Նրա դիտարկմամբ՝ պահպանողականները կհաղթեին, եթե ընտրություններին քաղաքացիների մասնակցությունն ավելի ակտիվ լիներ։ Մինչդեռ, առաջին փուլին մասնակցեցին քաղաքացիների միայն 40 տոկոսը։

«Առաջին փուլում փաստացի ձայների մեծամասնություն հավաքեց բարեփոխական թևի ներկայացուցիչ Փեզեշկյանը, որը եղել է նախագահ Խաթամիի կառավարությունում և զբաղեցրել նախարարի պաշտոն։ Երկրորդ տեղը զբաղեցրեց Սաիդ Ջալիլին, որը պահպանողականների ներկայացուցիչն է և հոգևոր առաջնորդի կողմից նշանակվել էր միջուկային հարցերով նախկին բանակցող։

Մենք 2-րդ փուլում կտեսնենք, որ պահպանողականները կմիավորվեն, այդ մասին թեկնածուներն արդեն հայտարարություներով են հանդես եկել։ Նրանք կմիավորվեն Ջալիլիի շուրջ։ Նշվում է, որ հեղափոխության պահապանների կորպուսը նաև հայտարարել է, որ ամեն ինչ կանի, որպեսզի պահպանողականներն ավելի միավորված լինեն։ Այսինքն, երկրորդ փուլում պահպանողականների թևը կփորձի միավորվել և ավելի շատ ձայն հավաքել։

Կարծում եմ, մենք կտեսնենք նաև քաղաքացիների ավելի շատ մասնակցություն, որովհետև, եթե առաջին փուլում քաղաքացիները որպես այդպիսին մեծ ակտիվություն չէին ցուցաբերում, քանի որ նաև սոցհարթակներում բավական շատ էին խոսում այն մասին, որ Ղալիբաթն է հաղթելու, մինչդեռ, առաջին փուլը միանգամայն այլ բան ցույց տվեց։ Կարծում եմ, իրական ընտրությունը ցույց տվեց, որ քաղաքացիների ձայները բաժանվել են 2 մասի, ուստի 2-րդ փուլում մենք կտեսնենք իրական ընտրություններ և բավական թեժ ընտրապայքար»։

Հարցին, թե որքանով են Իրանում ընթացող արտահերթ ընտրությունները զերծ արտաքին ուժերի ազդեցությունից, քանի որ մտավախություններ էին հնչում, որ թեկնածուներից մեկի՝ Մասուդ Փեզեշկյանի օգտնի է աշխատում նաև թուրքական լոբբին ու նա նաև թուրքախոս է, ուստի, որքանո՞վ է հավանական, որ նրա ընտրվելու դեպքում Իրանի արտաքին քաղաքականությունը և Հայաստանի հետ հարաբերությունները որոշակի վերանայվեն՝ Իսկանդարյանը պատասխանեց, որ հնարավոր է, որ նրան աջակցելու համար որոշակի գործողություններ արվում են։ «Սակայն, եթե անգամ նա ընտրվի, միևնույն է, իրականացվելու են Իրանի Իսլամական Հանրապետության հոգևոր առաջնորդի մշակած ծրագրերը։ Իրանի արտաքին և ներքին քաղաքականությունը որոշում և մշակվում է հոգևոր առաջնորդի կողմից, նախագահը դրա իրականացնողն է, այսինքն նախագահը չի կարող այնպիսի որոշումներ կայացնել, որոնք հակասում է Իրանի հոգոր առաջնորդի մշակած ծրագրերին։ Հետևապես, մենք կարող ենք անգամ բացառել դա՝ անկախ նրանից, թե որ թեկնածուն կլինի։ Այսինքն, նա չի կարող իրականացնել իր ծրագրերը։ Իրանի նախագահը Սահմանադրությամբ չունի նման լիազորություններ, նա պետք է կատարի հոգևոր առաջնորդի մշակած ծրագրերը միայն»։

Աղբյուր` Փաստինֆո