Փաստ ինֆո

Ժողովրդավարության հայկական ֆորումը լավ առիթ է քննարկելու ՀՀ-ում ժողովրդավարության և ժողովրդավարական բարեփոխումների առաջընթացը, և քննարկելու այն մարտահրավերները, որ Հայաստանում գոյություն ունեն ժողովրդավարական բարեփոխումների և ժողովրդավարության զարգացման համար: Այս մասին վերոհիշյալ ֆորումի ընթացքում ասաց ՀՀ վարչապետ Նիկոլ Փաշինյանը:

«Ֆորումի արդյունքներով լավ կլինի, որ մենք միասին ամփոփենք, թե հետագա զարգացման ինչ մարտավարություն պետք է որդեգրենք ժողովրդավարական բարեփոխումների համար և ճանապարհային ինչ քարտեզ պետք է ունենանք, որ ժողովրդավարության զարգացման առումով մեր ջանքերը համադրվեն»:
Նա նշեց, որ նախ պետք է արձանագրեն, թե ինչ է տեղի ունեցել ժողովրդավարության այն օրակարգի հետ, որ ունեցել ենք 7 տարի առաջ:
«Պետք է արձանագրեմ, որ քիչ չեն այն փոփոխությունները, որ ՀՀ-ում տեղի են ունեցել ժողովրդավարության առումով: Օրինակ, «ընտրությունների կեղծիք», «ընտրությունների արդյունքների կեղծել» արտահայտություններն արդեն պատմական ժանրին է վերագրված ՀՀ-ում: ՀԻմա եթե ՀՀ քաղաքացիներին ասենք, ընտրակեղծիք՝ շատերը կզարմանան, թե դա ինչ թեմա է։

Երբ որևէ ճանապարհ տասնյակ տարիներ կիսավեր վիճակում է և հանկարծ հիմնանորոգվում է, դա մարդկանց համար նորություն է ընդամենը մեկ շաբաթ, դրանից հետո դա առօրեականություն է, դրանով ոչ մեկի այլևս չես զարմացնի կամ ուրախացնի, հիմա արդեն իրենց նոր առիթներ են պետք ուրախանալու համար»,-ասաց նա:

Փաշինյանը նաև անդրադարձավ հավաքների ազատությանը՝ ընդգծելով, որ 7-8 տարի առաջ քննարկվում էր այն, որ տեղեր կային, որ հավաք անելը այնքան էլ հեշտ չէր, եթե չասենք՝ անհնարին էր, անգամ հյուրաոցներում դահլիճներ վարձելը հեշտ չէր՝ քաղաքական միջոցառումներ իրականացնելու համար։

«Կարծում եմ՝ սա նույնպես մի թեմա է, որն անցյալում է Հայաստանում, բայց, իհարկե, մենք գոհ չենք ժողովրդավարության այն որակից որ ունենք այսօր Հայաստանում։ Մասնավորապես, ՏԻՄ մակարդակով ընտրությունները բավականաչափ քաղաքականացված, քաղաքացիականացված և համայնքացված չեն։ Այսինքն, ընտրությունների այն մակարդակը, որ մենք ունենք համապետական մակարդակում՝ ՏԻՄ մակարդակում այնքան էլ արձանագրված չէ»:

Աղբյուր` Փաստինֆո