Փաստ ինֆո

Իրանում մեկնարկել են արտահերթ նախագահական ընտրությունները։ Ընտրատեղամասերը բացվել են տեղի ժամանակով ժամը 8-ին, Երևանի ժամանակով 06:30-ին։

Իրանի ԿԸՀ ներկայացուցիչ Մոհսեն Էսլամիին հայտնել է, որ տեղամասերը կփակվեն Իրանի ժամանակով ժամը 20:00-ին, սակայն անհրաժեշտության դեպքում դրանց աշխատանքը կերկարաձգվի: Տեղամասերում անվտանգությունն ապահովում է շուրջ 180 հազար ոստիկան։

Նախագահի պաշտոնի համար պայքարեն չորս թեկնածուներ, որոնցից երեքը պատկանում են պահպանողական ճամբարին, իսկ չորրորդը՝ բարեփոխականներին։

Իրանի նախագահի ընտրություններին մասնակցում են խորհրդարանի խոսնակ Մոհամմադ Բաղեր Ղալիբաֆը, Իսլամական Հանրապետության Անվտանգության խորհրդում հոգևոր առաջնորդի ներկայացուցիչ Սաիդ Ջալիլին, ներքին գործերի և արդարադատության նախարարությունների նախկին ղեկավար Մոստաֆա Փուրմոհամադին և առողջապահության նախկին նախարար Մասուդ Պեզեշքյանը:

Քվեարկության մեկնարկի օրվա նախօրեին ընտրություններին մասնակցելուց հրաժարվել է Թեհրանի քաղաքապետ Ալիրեզա Զաքանին, որը պահպանողականների ճամբարի երկու առավել հայտնի քաղաքական գործիչներին՝ Ջալիլիին և Ղալիբաֆին, խնդրել է միավորել ջանքերը ռեֆորմիստ Պեզեշքյանի դեմ:

Իրանում նախագահական 14-րդ ընտրություններն արտահերթ են, այս ընտրությունները նշանակվել են մայիսին ավիավթարի հետևանքով երկրի նախագահ Էբրահիմ Ռաիսիի մահից հետո։

Երկրի նախընտրական շտաբի ղեկավար Սեյեդ Մոհամմադ-Թաղի Շահչերագինհայտնել է, որ քվեարկություն կիրականացվի Իրանի ներսում և այլ երկրներում՝ շուրջ 90 հազար կետերում։ Ընտրական շտաբները տեղակայված են 99 երկրների 138 ներկայացուցչություններում։ Քվեարկության առաջին արդյունքները կհրապարակվեն հունիսի 29-ին՝ մինչև կեսօր։

Աղբյուր` Փաստինֆո