Փաստ ինֆո

Ադրբեջանում արտահերթ ընտրությունները սովորական են, սա արդեն Ադրբեջանում ձևավորված քաղաքական «սովորույթ» է՝ անընդհատ իրականացնել արտահերթ ընտրություններ։ Այս մասին «Փաստինֆոյի» հետ զրույցում ասաց ադրբեջանագետ Գառնիկ Դավթյանը՝ ընդգծելով, որ այդ արտահերթ ընտրությունները հնարավորություն են տալիս իշխանությանը սահմանափակելու ընդդիմադիր դաշտի ակտիվությունը։ «Չնայած իրական ընդդիմություն Ադրբեջանում չկա, բայց ընտրությունների նպատակն է զսպել ընդդիմադիր ուժերին, գործիչներին, որպեսզի նրանք ընտրազանգված ձևավորելու, ընտրություններին նախապատրաստվելու, պատշաճ քարոզարշավ իրականացնելու, հանրությանը ճիշտ քաղաքական մեսիջներ ուղղելու հնարավորություն չունենան»։

Միաժամանակ, նա նաև ընդգծեց, որ, օրինակ, արտահերթ նախագահական ընտրություններին Ալիևը մասնակցեց Ստեփանակերտում, թեև պետք է իր գանցման հասցեում մասնակցեր ու այստեղ օրենքի հետ կապված խնդիր կար, բայց հիմա էլ դա պետք է պրոյեկտել խորհրդարանական ընտրությունների վրա։

«Այսինքն, կլինեն թեկնածուներ, որոնք կմասնակցեն Լեռնային Ղարաբաղից և, հետագայում նրանք միջազգային հարթակներում կներգրավվեն ու նրանց վրա պարտավորություն կդրվի՝ ֆինանսական աջակցություն, ներդրումներ ներգրավ Լեռնային Ղարաբաղ։ Այսինքն, այս մարդիկ միջազգային հանրության մոտ Արցախը ներգրավվելու և քաղաքական առումով ինտեգրելու հարցերն են լուծելու»,- ասաց ադրբեջանագետը։

Անդրադառնալով ընտրություններին, այսպես կոչված՝ «Արևմտյան Ադրբեջան» կառույցի հնարավոր ներգրավմանը՝ քաղաքագետն ասաց, որ այս կառույցի անդամները մաս են կազմում Ալիևի իշխանության և տարբեր պաշտոններ են զբաղեցնում։ «Չեմ կարող ասել, թե ինչ ձևաչափով «Արևմտյան Ադրբեջան» հակահայկական կառույցը ներգրավվածություն կունենա խորհրդարանական ընտրություններում, բայց այդ թեզը դարձել է պետական մակարդակի լուրջ քաղաքականություն, որի նպատակը Հայաստանի նկատմամբ տարածքային պահանջներ ներկայացնելն է։ Գիտենք նաև, որ կա տեսլական այդ կազմակերևպության կողմից ներկայացված, ըստ որի՝ ադրբեջանցիները պետք է վերադառնան ու բնակվեն մեր երկրում, իսկ այդ «վերաբնակեցված» մարդկանց ղեկավար է հարկավոր։ Բացատված չէ, որ այդ մարդիկ շրջանային իշխանությունների մաս կազմեն, այսինքն, լինեն օկրուգի ներկայացուցիչ, որը այդ շրջանի բնակիչների իրավունքները ու շահերը պաշտպանելու «լիազորություն» կունենան»։

Դավթյանը նաև նշեց, որ միանշանակ, մեծ է հավանականությունը, ավելին՝ Ադրբեջանին հարկավոր է, որպեսզի այդ «Արևմտյան Ադրբեջան» հակահայկական կառույցը նույնպես միջազգային ներգրավում ապահովելու համար այս կամ այն կերպ ներկայությունն ունենա խորհրդարանում։ «Այսինքն, ենթադրվում է, որ այդ կառույցից ևս մի քանի հոգի ներգրավված կլինեն խորհրդարանում, որոնք խումբ կձեւավորեն և կգործեն՝ միջազգային հանության մոտ այսպես կոչված՝ «Արևմտյան Ադրբեջանի» շահերը ներկայացնելու համար, հավանականությունը մեծ է, որ Ադրբեջանի իշխանությունը նման մարտավարություն որդեգրեն»։

Աղբյուր` Փաստինֆո