Փաստ ինֆո

Պետդեպարտամենտի ամեն տարվա զեկույցում էլ Հայ Առաքելական եկեղեցու նկատմամբ որոշ հավակնություններ եղել են, ամեն տարի էլ անդրադարձ եղել է, չի եղել այնպիսի տարի, որ պետդեպարտամենտի զեկույցում Հայ Առաքելական եկեղեցին չնշվի՝ իբրև կրոնական մոնոպոլ կառույց, իբրև միահեծան իշխանություն ունեցող կառույց։ Սա նորություն չի, տարօրինակ չի։ Այս մասին «Փաստինֆոյի» հետ զրույցում ասաց Շիրակի թեմի առաջնորդ Միքայել արքեպիսկոպոս Աջապահյանը։ Նշենք, որ նախօրեին հրապարակված ԱՄՆ Պետդեպարտամենտի զեկույցում հատուկ անդրադարձ էր կատարվել Հայ Առաքելական Եկեղեցուն՝ մտահոգություն հայտնելով, որ եկեղեցու ներկայացուցիչները, այդ թվում՝ Հայ Առաքելական Եկեղեցու առաջնորդ, կաթողիկոս Գարեգին Բ-ն հրապարակավ քննադատել են վարչապետ Նիկոլ Փաշինյանին՝ կապված Լեռնային Ղարաբաղի հակամարտության հարցում կառավարության գործունեության հետ, որ 2023 թ. ընթացքում Հայ Առաքելական Եկեղեցու հոգևորականները շարունակել են առանց սահմանափակումների մասնակցել քաղաքացիական դիսկուրսին, իսկ Գարեգին Բ կաթողիկոսը՝ կոչեր հնչեցնել վարչապետ Փաշինյանի հրաժարականի մասին:

Սրբազանն ասաց, որ ԱՄՆ իշխանությունները անհանգստացած են, քանի որ այս իշխանությունները «իրենց սրտի իշխանությունն են»։ «Եթե իրենց սրտի իշխանությունը չլիներ՝ հիմա հակառակը՝ մեզ կգովեին, կասեին, որ մենք դեմոկրատական շարժում ենք գլխավորում։ Բայց քանի որ իրենց սրտով է այս իշխանությունը՝ մենք հակադեմոկրատ ենք։

Ամերիկյան իշխանությունը աշխարհի ամենասուբյեկտիվ իշխանությունն է՝ դեմոկրատական քողի տակ։ Այն, ինչ իրենց համար ընդունելի է՝ պետք է ընդունելի լինի բոլորի համար, այն ինչ իրենց համար իրենց համար մերժելի է՝ պետք է մերժելի լինի բոլորի համար։ Սա կոչվում է «ամերիկյան մեսսիոնիզմ»։

Անդրադառնալով Սահմանադրության մեջ եկեղեցու դերի ամրագրմանն անդրադարձին՝ Սրբազանը նշեց, որ ինքը միշտ էլ դեմ է եղել, որ եկեղեցին սահմանադրության մեջ նշված է և դրանում առանձնահատուկ տեղ է հատկացված եկեղեցուն։ «Հայ եկեղեցին հայ ժողովրդի միասնության շաղախն է։ Հայությունն ինչքան էլ բազմաթիվ բեկորների, մտածողությունների, հորիզոնականների, գաղափարախոսականների մեջ լինի՝ մի հաստատություն կա, որով միացած է, ու դա հայ եկեղեցին է։ Դա էլ վերացվի՝ հայ ժողովուրդը կվերածվի կտոր-կտոր մի զանգվածի, որը կլինի հեշտ կառավարելի, իսկ ԱՄՆ-ին ի՞նչ է պետք, հեշտ կառավարելի զանգված»։

Հարցին, թե հնարավոր համարում է, որ կառավարությունը նաև այս զեկույցը իբրև հիմնավորում կմատնանիշի, որպեսզի Սահմանադրությամբ եկեղեցուն վերագրվող հատուկ կարգավիճակը վերանայի՝ Աջապահյանն ասաց, որ, իհարկե, իշխանությունները կուզենան սա անել և, իհարկե, դա սահմանադրությամբ և հանրաքվեով հնարավոր է։ «Բայց մինչև հանրաքվեին հասնելը՝ պետք է մտքերը պատրաստել, թշնամացնել ժողովրդին եկեղեցու հետ, որ այդ հարցը լուծվի հանրաքվեով, այլապես հնարավոր չէ»։

Անդրադառնալով այլ կրոնական կազմակերպությունների թիրախավորմանը՝ նա նշեց, որ զեկույցում հստակ չէ, թե ում կողմից են թիրախավորվում այլ կրոնական կազմակերպությունները։

«Մեր ժողովրդից ավելի հանդուրժող ժողովուրդ որտե՞ղ կա։ Թող հարցնեն ազգային փոքրամասնություններին՝ մեր ժողովրդից ավելի հանդուրժող ժողովուրդ որտե՞ղ կա։ Իսկ երբ Իսրայելում ամեն քայլափոխի հրեա ծայրահեղականները թքում են հայ հոգևորականների վրա, դա տեսնո՞ւմ է ԱՄՆ դեպարտամենտը, չի տեսնում չէ, երբ այդ նույն կրոնական կազմակերպությունների ներկայացուցիչները այնքան են լկտիանում, որ մտնում են եկեղեցու տարածք և իրենց գրականությունն են բաժանում, դա տեսնո՞ւմ է պետդեպարտամենը, երբ միլիոնավոր դոլարներ են ծախսվում մարդկանց հոգին գնելու համար, դա տեսնո՞ւմ է պետդեպարտամենտը, երբ մարդորսությամբ են զբաղվում, ոչ թե գաղափարական քարոզչությամբ՝ դա պետական դեպարտամենտը չի՞ տեսնում։ Ուրեմն այդ երկարկի ստանդարտը, որն ամերիկյան մեսիոնիզմի բաղկացուցիչ մասն է, դրանից թող հրաժարվեն։ Եթե մի բան տեսնում եք՝ տեսեք ամեն ինչ, եթե մի բան չեք տեսնում, ուրեմն՝ ոչ մի բան էլ մի տեսեք»։

Աղբյուր` Փաստինֆո