Փաստ ինֆո

Մեր շարժման տրամաբանությունը լինելու է այն, ինչով մենք սկսել ենք։ Վերստին ուզում եմ կրկնել՝ մեր շարժման հիմքը, էությունը, բովանդակությունը բարձր իմաստով հոգևոր է։
Այս մասին Սուրբ Աննա եկեղեցու բակում ընթացող հավաքի ժամանակ ասաց Բագրատ Սրբազանը

«Շարժման տրամաբանությունը նույնն է։
Եթե նկարագրելու լինենք տեսակով՝ ազգային ազատագրական է, իսկ վերջնահանգրվանի լուծումները քաղաքական են»,- ասաց նա։

Բագրատ Սրբազանը շեշտեց՝ Շարժումը հաշտության մասին է, արդարության մասին է, ճշմարտության մասին է, նաև ստի դեմ է։

«Մենք գիտենք, որ ստի հայրը սատանան է, ուրեմն, լայն իմաստով, մեր շարժումը չարիքի դեմ է, չարիքը մեր երկրից վերացնելու դեմ է, չարիքի մարմնավորման դեմ է, այն չարիքի, որը վիշապի պես նստած է զուլալ աղբյուրի ակունքին ու ոչ միայն խմում է այդ ջրերը՝ փչացնելով, սպառելով ու ոչնչացնելով, այլև միևնույն ժամանակ ծարվի է մատնում ողջ ժողովրդին։ Հետևաբար, շարժման էությունը հոգևոր բարոյագիտական արժեքների մասին է։ Եթե մենք արժեքային փոփոխություն չունեցանք, 100 իշխանություն էլ փոխվի էլ ավելի վատն է լինելու մեր կյանքը, որովհետև հիմք չի ունենալու, որովհետև իշխանությունը ծնվելու է նույն չարիքի միջից, որի մեջ մենք հիմա ապրում ենք, դա կլինի, քաղաքական դաշտում, բարոյական դաշտում, արժեքների դաշտում։

Այդ չարիքը լինելու է մեր թիրախը, մեր հիմնական թիրախը, այն վերացնելն է լինելու մեր թիրախը, ազատագրությունը»,- ասաց Սրբազանը։

Ինչ վերաբերում է քաղաքական լուծումներին, ապա Սրբազանը նշեց, որ դրա պահանջը իրենք արդեն դրել են։

«Լուծումները տարաբնույթ են, բայց մեկն է թիրախը՝ ազատագրում չարիքից։ Եվ դա քաղաքական լուծում է։ Մեր պայքարն այդպես է լինելու»,- ասաց Բագրատ Սրբազանը։

Աղբյուր` Փաստինֆո