Փաստ ինֆո

Երևանի ընդհանուր իրավասության քրեական դատարանում՝ դատավոր Վարդան Գրիգորյանի նախագահությամբ, մեկնարկել է ԱԺ «Հայաստան» խմբակցության պատգամավոր Լևոն Քոչարյանի օգնական Արթուր Սուքոյանի և իշխանական «Սիվիկ» լրատվականի լրագրող Դավիթ Լևոնյանի միջադեպի գործով դատական նիստը։

Հիշեցնենք, որ իշխանական կայքի լրագրողի և Ռոբերտ Քոչարյանի որդու՝ ԱԺ պատգամավոր Լևոն Քոչարյանի օգնական Արթուր Սուքոյանի մասնակցությամբ միջադեպ է տեղի ունեցել, որի ընթացքում Սուքոյանն իբրև հարվածել է «Civic.am»-ի լրագրողին, որը ստահոդ լուրեր է տարածում Տավուշի թեմի առաջնորդ Բագրատ Սրբազանի դեմ։ Միջադեպից հետո լրագրողը հաղորդում է ներկայացրել, նախաձեռնվել է քրեական վարույթ, որով ինքը տուժող է ճանաչվել։ Արթուր Սուքոյանը մայիսի 1-ին ձերբակալվել է, ապա՝ կալանավորվել։ Հետագայում նրա նկատմամբ որպես խափանման միջոց է կիրառվել տնային կալանքը։

«Փաստինֆո»-ի հաղորդմամբ՝ Արթուր Սուքոյանի պաշտպան Ալեքսանդր Կոչուբաևն այսօրվա նիստում միջնորդություն ներկայացրեց՝ պահանջելով դադարեցնել Սուքոյանի նկատմամբ քրեական հետապնդումը՝ պնդելով, որ նրա նկատմամբ հետապնդումն իրականացվում է քաղաքական շարժառիթներով։ Փաստաբանը հիշեցրեց ՀՀ Սահմանադրությունը, համաձայն որի՝ ՀԱԵ-ն ունի սահմանադրական հիմունքի կարգավիճակ, ուստի, այս դեպքում Արթուր Սուքոյանը ծայրահեղ անհրաժեշտությամբ է գործել, ինչը քրեական հետապնդումը դադարեցնելու հիմք է։ Փաստաբանը կարևորեց եկեղեցու կարգավիճակը, քանի որ կարևոր է՝ եկեղեցու համբավի պաշտպանությունն ինչ աղերսներ ունի քրեական օրենսգրքի հետ։ Նա նշեց, որ ՀՀ 96 տոկոսի դավանանքը քրեիստոնեություն է, աղանդավորները և աթեիստները՝ չորս տոկոս և նման ցուցանիշներով պետության մեջ եկեղեցուն հայհոյելը, վարկաբեկելը հանցագործության սադրանք է։ Հանրային մեղադրողն առարկեց միջնորդության դեմ՝ գտնելով, որ այդ միջնորդությունն այս փուլում չի կարող քննարկվել։ Լսելով կողմերին՝ դատարանը նշեց, որ միջնորդության լուծում տալու համար անհրաժեշտ է պատասխանել մի քանի հարցի՝ արդյոք Սուքոյանը կատարել է որևէ արարք, թե՝ ոչ, եթե այո, ապա դիտավորյալ, թե՝ ոչ, եթե դիտավորյալ է եղել, ապա արդյոք անհրաժեշտություն եղել է, թե ոչ, եթե եղել է ծայրահեղ անհրաժեշտություն, ապա արդյոք եղել է սահմանազատում, սակայն այս հարցերին պատասխանելու համար պետք է հետազոտվեն ապացույցները։ Դատարանը որոշեց մերժել միջնորդությունը։

Հեղինակ՝ Իզաբել Սահակյան

Աղբյուր` Փաստինֆո