Փաստ ինֆո

Մենք պետք է սկզբունքային որոշում կայացնենք, այն մասին, թե ում համար է դպրոցը, սա շատ սկզբունքային հարց է։ Այս մասին կառավարության նիստում ասաց վարչապետ Նիկոլ Փաշինյանը։

«Երբեմն ես տպավորություն եմ ստանում, որ դպրոցը հաշվապահների համար աշխատատեղ է, դպրոցը տնտեսվարների համար աշխատատեղ է, մաքրուհիների համար աշխատատեղ է, ես եկել եմ եզրակացության, որ մենք այս բոլոր հարցերին պետք է պատասխանենք՝ ոչ։ Դպրոցը երեխայի համար։ Ընկալումը, որ մենք դպրոցը ստեղծել ենք, որ աշխատատեղ լինի՝ սխալ ընկալում է։ Աշխատատեղ ստեղծելու համար գուցե պետք է շինվերանորոգման արտադրամաս ստեղծել։ Դպրոցը երեխայի համար է։ Եթե կասկածի տակ ենք դնում բոլոր երեխաների համար նույն մակարդակի և բարձր մակարդակի կրթություն ստանալու իրավունքը, ապա գնում ենք սխալ ճանապարհով»։

Նա նշեց, որ վերջին շրջանում ստանում է նամակներ, որտեղ խնդրում են չփակել գյուղի դպրոցը։ «Հիմնականում շեշտադրումն արվում է այն գյուղերում, որտեղ կան փոքրաթիվ աշակերտներ, 5, 7, 10, 20։ Մենք մոտակա տեղում ստեղծում են կրթահամալիր, նոր դպրոց ենք կառուցում, որովհետև ոչ մեկ չի ասում, որ գյուղի դպրոցը պետք է լինի գյուղապետարանի շենքի հետևին»։

Նա նաև հայտնեց, որ պիտի նորոգվեն դպրոց տանող ճանապարհները, պետք է ձեռք բերվեն տրանսպորտային միջոցներ, որոնք առավոտյան երեխաներին կտանեն դպրոց, երեկոյան տուն կբերեն։ «Այսինքն, սխալ է այն ընկալումը, որ դպրոցը գյուղի ենթակառուցվածք է։ Շատ գյուղերում ասում են, եթե դպրոցը փակվի՝ դպրոցը կդատարկվի։ Բայց այդ դպրոցում 30 տարի առաջ եղել է ենթադրենք 150-300 աշակերտ, բայց այսօր 30-40 է, գյուղը դատարկվել է՝ դպրոցի առկայության պայմաններում, այդ թվում՝ այն պատճառով, որ բազմաթիվ ծնողներ տեսել են, որ իրենց երեխան նույն կրթությունը չի ստանում, ինչ ստանում են մարզկենտրոնի կամ Երևանի երեխաները ու տեղափոխվել են, հետևաբար սա գյուղի զարգացման մասին է, ոչ թե հակառակը»։

Նա նաև ընդգծեց, որ դպրոցը նաև երեխայի սոցիալիզացիայի մասին է։ «Պատկերացրեք երեխա, որ իր կրթության ողջ ընթացքում շփվում է ընդամենը 10 -20 երեխպաների հետ։ Մենք ունե՞նք վերլուծություն, թե սա ինչ խնդիր է առաջացնում։
Հետագայում բանակում, երբ մենք խնդիր ենք տեսնում երեխաների հաղորդակցվելու հետ կապված՝ այս թեմային չենք անդրադառնում, քանի որ երեխան իր հասակակիցներից 20 հոգուց ավելի մարդու հետ շփվելու փորձ չունի։ Այս պրոբլեմը շատերը չեն պատկերացնում։

Հետևաբար, այդ արձանագրումները պետք է անենք, դպրոցը բուլկի թխողի համար չի, ջեմ արտադրողի համար չի, էլեկտրիկի համար չի, անգամ ուսուցչի կամ տնօրեին համար չի, ընտրական տեղամասի համար չի, երեխայի համար է։ Մյուսները երեխաներին սպասարկող անձնակազմ են»։

Աղբյուր` Փաստինֆո