Փաստ ինֆո

Խոշտանգման դեպքերով բավականին մտահոգիչ է Հայաստանում տիրող իրավիճակը։ Ոստիկանների կողմից փաստաբանների նկատմամբ բռնության դեպքերը տարակուսանքի տեղիք են տալիս՝ համոզմունք ձևավորելով, որ ՀՀ-ում փաստաբանության ինստիտուտը, փաստաբանի մասնագիտական գործունեությունը բավականաչափ երաշխավորված չէ։

Սյս մասին հրավիրված ասուլիսում ասաց փաստաբան Կարեն Ալավերդյանը։

Փաստաբանը նաև մտահոգություն հայտնեց՝ այդ դեպքերին տրված քրեաիրավական գնահատականների առնչությամբ, օրինակ, Էրեբունու բաժնում փաստաբանների նկատմամբ բռնություն գործադրած դեպքով հետապնդում է իրականացվում ֆիզիկական ներգործության հատկանիշներով, որևէ գնահատական չկա մասնագիտական գործունեությանը խոչընդոտելու մասով։ Ալավերդյանը, անդրադառնալով իր նկատմամբ բռնության դեպքին, արձանագրեց, որ քանի որ որևէ տարբերակ չկա բացառելու, որ բռնություն է եղել թե իր, թե իր պաշտպանյալի նկատմամբ, կլինի իրավիճակ, որ թեև դեպքը տեղի է ունեցել, բայց չի հաջողվել պարզել, թե ովքեր են առնչություն ունեցել դեպքին։ Փաստաբանը նաև մտահոգություն հայտնեց առ այն, որ փաստաբանների նկատմամբ բռնության դեպքերի վերաբերյալ փաստերը վերացվել են։ Նրա խոսքով՝ խոշտանգման արգելքը բացարձակ է, անգամ՝ Կոնվենցիայով կյանքի իրավունքն ունի սահմանափակումներ, սակայն խոշտանգման արգելքը բացարձակ է։

«Այսինքն՝ անկախ նրանից, թե քաղաքացին իրեն ինչպես է դրսևորել կամ ինչ վերաբերմունք է ցուցաբերել, որևէ պարագա չկա, որը կարդարացնի նրա նկատմամբ անհամաչափ ֆիզիկական ուժի, առավել ևս՝ բռնարարքների կիրառումը»,- ընդգծեց Ալավերդյանը։

Աղբյուր` Փաստինֆո