Փաստ ինֆո

Գեղարքունիքի մարզի Ազատ գյուղի տարածքում տեղակայված զինվորական կացարանում 15 զինծառայողի կյանք խլած ողբերգական հրդեհի գործով մեղադրյալ Եղիշե Հակոբյանի կալանքի ժամկետը երկարացվել է։ Գեղարքունիքի մարզի ընդհանուր իրավասության դատարանը՝ դատավոր Վարդան Հարությունյանի նախագահությամբ, հունիսի 14-ին որոշում է կայացրել՝ Եղիշե Հակոբանի կալանքի ժամկետը ևս երեք ամսով երկարացնելու մասին։ Դատարանը որոշել է անփոփոխ թողնել նաև սահմանված սահմանափակումները՝ տեսակցությունների, անձանց հետ շփումների։ Դատարանը գտել է, որ դեռևս առկա են գործի քննությանը խոչընդոտելու ռիսկերը՝ նկատի ունենալով, որ դատարանում ցուցմունք են տվել միայն վկաների և տուժողների մի մասը, մինչդեռ, վերջիններիս հետ մեղադրյալը հիմնականում ունի ծառայողական կամ ընկերական շփումներ։

Ավելի վաղ՝ մայիսի 24-ին, դատարանը որոշել է երկարացնել նաև մեղադրյալ Գոռ Աղեկյանի կալանքի ժամկետը, նրա դեպքում՝ երկու ամսով։ Գոռ Աղեկյանի պաշտպանն արդեն իսկ վերաքննիչ բողոք է ներկայացրել՝ պահանջելով բեկանել և փոխել դատարանի որոշումը՝ Աղեկյանի նկատմամբ որպես խափանման միջոց կիրառելով տնային կալանք, բացակայելու արգելք և գրավը՝ 17,000,000 ՀՀ դրամի չափով։ Բողոքը նախօրեին մակագրվել է Վերաքննիչ քրեական դատարանի դատավոր Լուսինե Հովհաննիսյանին։

Հիշեցնենք, որ ողբերգական դեպքը տեղի է ունեցել 2023թ․ հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։
Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո