Փաստ ինֆո

Ադրբեջանում Հայաստանի տարածքը բաժանել են մասերի և իրենց հորինած տեղանուններով անվանում են «Արևմտյան Ադրբեջան»։ Այս մասին «Փաստինֆո» -ի հետ զրույցում ասաց ադրբեջանագետ Գրիգորի Այվազյանն՝ անդրադառնալով Ադրբեջանում անցկացված «Վերադարձ Արևմտյան Ադրբեջան» փառատոնին, որի ընթացքում Հայաստանի մարզերը ներկայացվել են ադրբեջանական տեղանուններով

Նա նշեց, որ մինչ այդ՝ նրանք կազմել են «Արևմտյան Ադրբեջանի» կառավարություն, անցկացրել են մի քանի միջոցառում Վարշավայում և Լոնդոնում, ընդ որում՝ դրան մասնակցել են նաև թագավորական ընտանիքների ներկայացուցիչները։

«Հետևապես, մենք պետք է արձանագրենք, որ իրենք, ըստ իս, ժամանակավոր օկուպացնելով Արցախը, դրանով իրենց ծրագրերը և ախորժակը չեն փակել, և այժմ մտածում են, որ ամբողջ Հայաստանն Ադրբեջան է, որ Երևանը ադրբեջանական քաղաք է, նրանք նաև կոնկրետ գործողություններ են կատարում։ Հետևապես, եթե հակիճ պատասխանեմ հարցին, թե ինչպես են այս տրամադրվածությամբ ադրբեջանցիները գնում խաղաղության, ապա պետք է ասեմ, որ իրենք ոչ մի խաղաղության դարաշրջան հնարավոր չէ, քանի դեռ ադրբեջանական նացիստական ռեժիմը ցանկանում է վերացնել, այսպես կոչված՝ «հայկական անիծյալ սեպը»։

Իրենք պատկերացնում են Հայաստանից մնացած մասը ադրբեջանաթուրքական տանդեմի ներսում՝ որպես անկլավ՝ ունենալով 19.200 քառակուսի կիլոմետր տարածքային պահանջ ներկայիս Հայաստանի Հանրապետության հանդեպ։ Սակայն ես ուզում եմ ասել, որ Հայաստանն ավելի շատ իրավունքներ ունի, որպեսզի ասի, որ ներկայիս Ադրբեջանի Հանրապետության ավելի քան 50 տոկոսը հայկական տարածքներ են, դա Արևելյան Հայաստանն է։

Մենք ունենք նաև ավելի քան 500 000 ադրբեջանահայություն, և մենք էլ կարող ենք և պետք է պահանջենք, որ մեզ վերադարձնեն հայկական Բաքուն, դուրս բերեն իրենց զորքերը օկուպացված Արցախից ամբողջությամբ, նաև Կիրովաբադից։ Մենք այդ ուղղությամբ պետք է աշխատենք»,- ասաց մեր զրուցակիցը։

Անդրադառնալով Ադրբեջանի՝ Հայաստանի դեմ ներկայացված հայցերին Հաագայի միջազգային դատարան՝ նա Այվազյանն ասաց, որ Ադրբեջանը բոլոր հնարավոր ատյաններում հայցեր է ներկայացրել, պնդելով, իբրև թե, Հայաստանը բռնազավթել է Ադրբեջանի մի մասը՝ Արցախը, օգտագործել նրա ընդերքը։ «Հետևապես, ցանկանում են մեր պարանոցին փաթաթել խաղաղության պայմանագիր, այն դեպքում, երբ Հայաստանը պատերազմի մեջ չի եղել, մենք որևէ ուրիշ երկրի տարածքում չենք գտնվել։ Արցախը անկախացել է Խորհրդային պետությունից՝ նախքան Ադրբեջանը, հետևաբար, եթե որևէ մեկը համարձակվի դիմել Մինսկի խմբի լուծարման համար, եթե որևէ մեկը ՀՀ-ի անունից փորձի կնքել «Խաղաղության պայմանագիրը», ապա Հայաստանի վզին կփաթաթի ռեպարացիաների հարցը։ Խոսքը միլիարդավոր դոլարների մասին է, նման բան չի կարելի թույլ տալ։ Սա այն դեպքում, երբ միայն Բաքվում հայերի թողած ունեցվածքը 100 միլիարդ դոլարի արժողություն ունի։ Այս ամենը հերթական անգամ փաստում է էսզիստենցիալ թշնամու հետ ինչ-որ խաղաղության մասին խոսելն անիմաստ է»։

Աղբյուր` Փաստինֆո