Փաստ ինֆո

Ապրիլի 26-ին Երևան-Սևան մայրուղու Հրազդանի հատվածում խաղաղ անհնազանդության ակցիաների ընթացքում ԱԺ պատգամավոր Արթուր Խաչատրյանի նկատմամբ բռնություն կիրառելու, նրան ապօրինի բերման ենթարկելու վերաբերյալ քրեական վարույթով սայլը տեղից որևէ կերպ չի շարժվում։ Գործի հարուցումից երկու ամիս անց , ինչպես պարզվեց, դեռևս որևէ ոստիկանի պատասխանատվության ենթարկելու հարց քննչական մարմինը չի բարձրացնում։

Հիշեցնենք, որ ապրիլի 26-ին խաղաղ անհնազանդության ակցիաների ընթացքում ոստիկանները բերման են ենթարկել անձեռնմխելիություն ունեցող պատգամավորին՝ բռնություն գործադրելով նրա նկատմամբ։ Պատգամավոր Արթուր Խաչատրյանը հանցագործության մասին հաղորդում է ներկայացրել գլխավոր դատախազություն՝ պահանջելով քրեական վարույթ նախաձեռնել։

«Հրաման տվողն ու քաշքշուկ հրահրողը ՀՀ ոստիկանության Կոտայքի մարզային վարչության պետ Ռուբեն Դավթյանն էր։ Վստահ եմ, որ հատկապես Ռ. Դավթյանը քաջատեղյակ էր, որ ես ԱԺ պատգամավոր եմ: Ի դեպ, Դավթյանը քաղաքացիական հագուստով էր և չէր ներկայացել։ Ճանապարհին ես իմ զարմանքն ու ընդվզումն էի արտահայտում, հատկապես պայմանավորված այն հանգամանքով, որ իրենք իրավունք չունեն ԱԺ պատգամավորին ազատությունից զրկելու և բերման ենթարկելու, սակայն ինձ չէին արձագանքում: Արդեն բաժանմունքում ինձ տեղեկացրեցին, որ ես ․․․․

բերման չեմ ենթարկվել։ Խոսքերն ավելորդ են»,- ֆեյսբուքյան իր էջում գրել էր Արթուր Խաչատրյանը։

Վարույթի հարուցումից երկու ամիս անց ոչ Արթուր Խաչատրյանն է տուժող ճանաչվել, ոչ էլ՝ որևէ ոստիկանի է մեղադրանք ներկայացվել։ Խաչատրյանը «Փաստինֆո»-ի հետ զրույցում հայտնեց, որ մեկ անգամ՝ որպես հաղորդում ներկայացրած անձ՝ հրավեր ստացել է, սակայն այլ զարգացումներ գործով չկան, որևէ անձի մեղադրանք չի ներկայացվել։

Նշենք, որ պատգամավոր Արթուր Խաչատրյանի նկատմամբ բռնության դեպքից օրեր անց՝ մայիսի 27-ին, ոստիկանների մեծաքանակ խումբը ՀՅԴ ԳՄ շենքի մոտից փորձել է բերման ենթարկել «Հայաստան» խմբակցության պատգամավոր Աշոտ Սիմոնյանին՝ պատգամավորի նկատմամբ բռնություն գործադրելով, խուլիգանական վարք ցուցաբերելով։ Տեսախցիկները ֆիքսել են, թե ինչպես են բերետավորները գետնին ընկած պատգամավորին հարվածներ հասցնում, անգամ պարզ երեւում են ոտքով հարվածող, ապտակող բերետավորների դեմքերը։

Այս դեպքով միայն մեկ ոստիկանի լիազորություն է դադարեցվել՝ ծառայողական քննության հետևանքով, քրեական վարույթով, սակայն, կրկին տեղաշարժ չկա։ ՔԿ-ն, կարծես, իր վրա է վերցրել հանցագործությունը կոծկելու պարտականությունը. առ այս պահը հայտնի չէ որևէ ոստիկանի մեղադրանք առաջադրելու մասին։

Դիտարկմանը, որ վերջին շրջանում կարծես թե օրինաչափություն է դարձել, որ անձեռնմխելիությամբ օժտված պատգամավորների նկատմամբ ոստիկանությունը բռնություն գործադրում, բերման ենթարկում՝ Խաչատրյանն արձագանքեց՝ նշելով․ «Իհարկե, Գեղամ Մանուկյանն ու Աշոտ Սիմոնյանը՝ ցցուն օրինակ։ Օրինաչափություն է դարձել, փորձում են ցույց տալ, որ իրենց համար որևէ օրենք չի գործում։ Կարծել, որ չէին ճանաչում Գեղամ Մանուկյանին, Աշոտ Սիմոնյանին, Արծվիկ Մինասյանին, ինձ՝ մի փոքր ողջախոհության սահմաններից դուրս է »։

Հեղինակ՝ Իզաբել Սահակյան

Աղբյուր` Փաստինֆո