Փաստ ինֆո

Երեւան-Ապարան միջպետական ճանապարհն արդեն բաց է. Վարդենուտ գյուղի բնակիչներին խոստացել են հանդիպում կազմակերպել Նիկոլ Փաշինյանի հետ։

Ինչպես արդեն հայտնել ենք վաղ առավոտից գյուղացիները փակել էին միջպետական ճանապարհը՝ բողոքելով կառավարության որոշման դեմ, որով Վարդենուտ գյուղի հողատարածքներից 110 հա ճանաչվել է հանրային գերակա շահ։ Կառավարությունը համաձայնել է, որ «ՌԻԴ» ՍՊԸ-ն այդտեղ ամառային և ձմեռային զբոսաշրջային, լեռնադահուկային, էկոգյուղատնտեսական արտադրության կենտրոնի ստեղծի, իսկ ընկերությունը բավական քիչ գումար է առաջարկում գյուղացիներին՝ որպես փոխհատուցում։ Ճանապարհը բացելու համար գյուղացիների հետ բանակցում էին ոստիանության ու ՏԻՄ իշխանությունների ներկայացուցիչները։

«Պայմանավորվեցինք, որ Արագածոտնի մարզպետը վարչապետի հետ ընդունելություն պետք է կազմակերպի, տեսնենք, թե ինչ կլինի», - «Փաստինֆո»- ին ասաց Վարդենուտ գյուղի բնակիչ Հրանտ Գյորջյանը։

Նրա փոխանցմամբ՝ ընկերության սեփականատերը, օգտվելով հանգամանքից, որ ՀՀ կառավորությունը գերակա շահ է ճանաչել իրենց հողերը, չափազանց փոքր փոխհատուցման գումար է առաջարկում։ «Ոչ թե փոքր, այլ ձեռ առնելու աստիճան փոքր գումար է առաջարկում։ Չենք հասկանում, թե ինչ մասնագետների օգնությամբ են գնահատել հողը եւ քառակուսի մետրի դիմաց 300 դրամ են առաջարկում, ինչին գումարում են 15 տոկոս՝ որպես գերակա շահ համարվող, եւ տալիս են միայն 345 դրամ։Այն դեպքում, երբ մեզանից մի քանի կմ այն կողմ,եթե Աշտարակ իջնեն՝ Կարպիում, կամ մի քիչ վերև բարձրանանաք, մեկ մետր քառակուսին արժե 50 ԱՄՆ դոլարին համարժեք դրամից ոչ պակաս։ Ես անկախ գնահատող եմ կանչել 2023 թ. նոյեմբեր ամսին, նա գնահատել է ու ասել, որ մեր հողերի մետր քառակուսու շուկայական արժեքը 3100 դրամ է », - ասաց Գյորջյանը։

Մեր զրուցակիցը պատմեց, որ «ՌԻԴ» ՍՊԸ ընկերության սեփականատիրոջն առաջարկել են հենց իրենց գյուղը դարձնել էկոգյուղ ու զբոսաշրջիկը, որը պետք է օգտվի այդ լեռնադահուկային համալիրից, էկոգյուղ տեսնելու, գյուղացու կենցաղին ծանոթանալու ցանկության դեպքում, հյուրընկալվի իրենց գյուղում «Թող Վարդենուտը ֆինանսավորեն, գյուղացիները հյուրատներ սարքեն, ոչ թե իրենց ապրուստի միջոց վարելահողերը կոպեկներով խլեն, ոչնչով իրենց չաջակցեն, դեռ իրենց առաջարկած ապագա աշխատատեղերն էլ կասկածելի լինի»,- նշեց Գյորջյանը՝ ավելացնելով, որ ընկերության կողմից իրենց առաջարկները չեն ընդունվել եւ հիմա ստիպված են սպասել, որ մարզպետը հանդիպում կազմակերպի վարչապետի հետ, բայց կանի թե ոչ դեռ չգիտեն։

Աղբյուր` Փաստինֆո