Փաստ ինֆո

Դերբենտում և Մախաչկալայում տեղի ունեցածը այլ կերպ, քան ահաբեկչություն չի կարելի որակել, եթե դրա պատճառների մասին խոսելու լինենք, ապա, իմ ունեցած տեղեկություններով, պատճառներից մեկը «Եդինայա Ռոսիյա» կուսակցությունից ահաբեկչությանկազմակերպիչների վտարումն է եղել։ Այս մասին «Փաստինֆոյի» հետ զրույցում ասաց միջզգայնագետ Դավիթ Կարապետյանը։

«Սա Դաղստանի Սերբոկալինյան շրջանի նախկին ղեկավարներ Մագամեդ Օմարովի և Օսման Ադիլի կողմից կազմակերպված ահաբեկչություն է, որոնք դա արել են «Եդինայա Ռոսիյա» կուսակցությունից հեռացվելու պատճառով։ Ես, իհարկե, չեմ կարծում, որ սա է միակ պատճառը, բայց չեմ էլ մտածում, որ տեղի ունեցածը արտաքին ուժերի կողմից ֆինանսավորման արդյունք է, թեև, օրինակ, «Կրոկուս Սիթիում» կատարվածից հետո, հետաքննությունը ուկրաինական հետք, այնուամենայնիվ, որոշակիորեն գտել էր։

Ամեն դեպքում՝ բոլոր ահաբեկիչները լիկվիդացված են ու հետաքննության ցանցացած արդյունք կամ տեղեկատվության հավաստիություն կարող է կասկածի տակ առնվել»,- ասաց միջազգայնագետը։

Փորձագետը նաև նշեց, որ ամբողջ Ռուսաստանում ահաբեկչական գործողությունների իրականացում չի կարելի բացառել։ «Այս պահին ռուսական հատուկ ծառայությունները աշխատանքներ են տանում նման դեպքերի կրկնությունը բացառելու համար, բայց այստեղ որոշակի վերապահումներ ունեմ, որովհետև քանի դեռ Նարիշկինի նման արտաքին հետախուզության ծառայության պետ ու անվտանգության ծառայության աշխատակիցներ կան Ռուսաստանում, ապա նման դեպքերի ականատեսը կարող ենք լինել»։

Ինչ վերաբերում է հավաքական արևմուտք- Ռուսաստան կոնֆրոնտացիայի սրմանը՝ Կարապետյանը կարծում է, որ այն արդեն բավականին սրված է։

«Եթե խոսքը ռազմաքաղաքական տեսանկյունից սրացման մասին է, ապա կարծում եմ՝ ոչ, քանի որ ամեն դեպքում՝ ՌԴ-ն նման իրավիճակներում շատ ադեկվատ է արձագանքում։ Դեպքերը շատ են, օրինակ՝ Թուրքիայում ՌԴ դեսպանի սպանության, կամ Ադրբեջանի հետ կապված դրվագում, երբ ինքնաթիռ էր խոցվել, նման դեպքերում ՌԴ-ն էմոցիոնալ չի արձագանքում։

Այս դեպքում էլ ՌԴ-ի կողմից որևէ քայլ չի ձեռնարկվի։ Եթե անգամ փորձաքննությունը ցույց տա, որ արտաքին միջամտություն կա՝ ՌԴ-ն իր արտաքին քաղաքականության ոլորոտւմ կարող է որոշակի վերանայումներ անել, բայց ֆիզիկական գործողություններ ես չեմ ակնկալում ՌԴ-ից, քանի որ այստեղ հասկանում են, որ դրանով իրեն ներքաշում են առավել գլոբալ հակամարտության մեջ ու արտաքին ուժերին պետք է, որ ՌԴ-ն իրապես էլ արձագանքի»։

Աղբյուր` Փաստինֆո