Փաստ ինֆո

Իսրայելի պաշտպանության նախարար Յոավ Գալանտը մեկնել է Վաշինգտոն՝ ամերիկացի բարձրաստիճան պաշտոնյաների հետ քննարկելու Գազայի հատվածում և լիբանանյան ճակատում հետագա քայլերը՝ հյուսիսային սահմանին իրավիճակի սրման ֆոնին, կիրակի հայտնել է Իսրայելի պաշտպանության նախարարության մամուլի ծառայությունը:

Նշվում է, որ այդ հանդիպումներում, ի թիվս այլ հարցերի, կքննարկվեն պաղեստինյան ՀԱՄԱՍ արմատական շարժման դեմ պատերազմի նպատակներին հասնելու համար անհրաժեշտ գործողությունները, Գազայի հատվածից իսրայելցի պատանդներին վերադարձնելու ջանքերը եւ տարածաշրջանում կայունության հասնելու համար անհրաժեշտ միջոցները:

«Այդ հանդիպումների ժամանակ ես նախատեսում եմ քննարկել Հարավային եւ Հյուսիսային ճակատներում, Գազայում եւ Լիբանանում տեղի ունեցող իրադարձությունները։ Այս քննարկումները հատկապես կարևոր և բովանդակալից են այս պահին։ Մենք պատրաստ ենք ցանկացած գործողության, որը կարող է պահանջվել Գազայում, Լիբանանում եւ լրացուցիչ շրջաններում», - Վաշինգտոն մեկնելուց առաջ հայտարարել է Գալանտը, որի խոսքերը տարածել է նրա մամուլի ծառայությունը։

Գալանտն ընդգծել է, որ ԱՄՆ-ն Իսրայելի ամենակարեւոր եւ առանցքային դաշնակիցն է՝ նշելով, որ երկրների միջեւ կապերը «ներկայումս, հնարավոր է, ավելի վճռորոշ նշանակություն ունեն, քան երբեւէ»:

Աղբյուր` Փաստինֆո