Փաստ ինֆո

Ես՝ որպես իրավաբան համոզմունք ունեմ, որ նույնիսկ հանրաքվեով չի կարող Հայաստանի Հանրապետության տարածքից մաս օտարվել, փոխանցվել մեկ ուրիշ պետության, չի կարող նվազեցվել կամ սեղմվել ՀՀ տարածքը։ Այս մասին «Փաստինֆոյի» հետ զրույցում ասաց փաստաբան Հայկ Ալումյանը։

«Ուրիշ բան է, որ մեզ պատմում են, թե հանձնվող տարածքները Հայաստանի մաս չեն, այստեղ շատ խնդիրներ են առաջանում։ Այսպես կարելի է վաղը ասել, որ Երևանն էլ Հայաստանի տարածք չի եղել ու Երևանն էլ մեկնումեկին տալ»,- նշեց փաստաբանը։

Նրա արձանագրմամբ՝ Հայաստանի տարածքների պատկանելիության հարցը հիմա փորձ է արվում իրավաբանական դաշտից տեղափոխել պատմաբանների և քարտեզագետների դաշտ։ «Այսինքն, ներկայացնում են, որ ոչ թե ՀՀ տարածքեներ են զիջում Ադրբեջանին, այլ հարցը ներկայացնում են այնպես՝ կարծես դա Հայաստանի տարածք չի էլ եղել։

Որպես իրավաբան, ես էլ կարող եմ ասել՝ դե ցույց տվեք դրա իրավական հիմքերը, որոնց հիման վրա նման հայտարարություններ եք անում։ Այսինք, իրենք այդ հարցը վերածում են քարտեզների հարցի և իրավաբանական ոլորտից հարցը հանում են։ Ասում են՝ այսինչ թվականի քարտեզով՝ այսպես է եղել, մյուսն էլ ասում է՝ էս ինչ թվականի քարտեզով գիծն այսպես է անցնում։

Ստացվում է, որ քարտեզագետները կարող են Հայաստանից տարածքներ տալ Ադրբեջանին և ասել, որ սա ոչ իրավական խնդիր է, ոչ էլ հանրաքվեի, քարտեզով այսպես է եղել և վերջ։ Մինչդեռ, իրականում սա հենց իրավական խնդիր է, որը տեղափոխել են այլ ոլորտ։

Հիմա մեկը մի քարտեզ է բերում, ասում է՝ այս քարտեզն է ճիշտը ու այստեղ այս տարածքը հայկական չէ, հետո, դե արի՝ հասկացի, թե էդ քարտեզը որտեղից գտավ ու ինչ քարտեզ է դա, ինչու է այն հիմք ընդունվում։

Իրականում, «ուժեղի մոտ միշտ էլ թույլն է մեղավոր» սկզբունքն է գործում։ Հիմա՝ երկար տարիներ անց հայտնվել ենք թույլի կարգավիճակում ու հիմա մեր առջև պահանջներ է դրված, մեր կառավարությունն էլ համաձայնել է այդ պահանջներին ու մեզ փորձում է հիմնավորել, որ այդ պահանջներին համաձայնելը պայմանավորված է ինչ- որ քարտեզներով, կամ իրավական նորմերով, այնինչ այդ լուծումները մեր վզին դրսից է փաթաթված»,- նշեց Հայկ Ալումյանը։

Աղբյուր` Փաստինֆո