Փաստ ինֆո

«Վերջին աշխարհաքաղաքական զարգացումները տանում էին նրան, որ ամեն դեպքում Պաղեստին պետության միջազգային ճանաչումը դառնում էր անխուսափելի», - «Փաստինֆո»-ի հետ զրույցում արձանագրել է միջազգայնագետ Գրիգոր Բալասանյանը։ Նշենք, որ վերջինս դեռեւս հունիսի 6-ին էր «Փաստինֆո»-ի եթերում արձանագրել Հայաստանի կողմից Պաղեստին պետությունը ճանաչելու անհրաժեշտությունը, ինչը նաեւ կլինի պատասխան Իսրայելին՝ Հայաստանի դեմ իրականացված եւ իրականացվող քաղաքականության, 44-օրյա պատերազմում Ադրբեջանին ցուցաբերած աջակցության համար։

«Շատ հաճելի է, որ այսօր ստացվեց տեղեկատվություն, որ Հայաստանն, ի վերջո, գնաց այդ քայլին, ճանաչեց Պաղեստինտ ժողովրդի անկախություն ունենալու իրավունքը։ Դա նաև մեր շահերից է բխում՝ հաշվի առնելով, որ արցախահայությունն էլ ունի անկախության ու ինքնորոշման իրավունք ու տասնամյակներ շարունակ պայքարել է անկախություն ունենալու համար»,- նշել է միջազգայնագետը։

Շնորհավորելով Պաղեստինին՝ Գ.Բալասանյանը հույս է հայտնել, որ ժամանակի ընթացքում նրանց կողմից ևս որոշակի քայլեր կձեռնարկվեն Արցախի ժողովրդի անկախ և ինքնիշխան ապրելու իրավունքը պաշտպանելու համար։

«Բնականաբար որոշակի արձագանք կլինի Իսրայելից, բայց հիմա արդեն այն վիճակն է, որ, մեծ հաշվով, մեզ չպետք է հետաքրքրի Իսրայելի արձագանքը, որովհետև Իսրայելն իր միակողմանի պրոադրբեջանակն քաղաքականության արդյունքում, ըստ էության, այրել է բոլոր կամուրջները և բոլոր այն հնարավոր շփման կետերը, որոնք կարող էինք օգտագործել այդ պետության հետ մեր հարաբերությունները բարելավելու համար», - ասաց Բալասանյանը։
Ըստ նրա՝ հաջորդ տրամաբանական քայլը պետք է լինի Իսրայելից առհասարակ մեր դեսպանին հետ կանչելը և այնտեղ մեր դեսպանատան փակումը։ Դա, փորձագետի գնահատմամբ, հնարավոր կլինի վերականգնել սառեցված կամ որոշակիորեն կորսված հարաբերությունները արաբական աշխարհի հետ և ավելի ջերմացնել հարաբերությունները՝ Իրանի Իսլամական հանրապետության հետ։

Ինչպես արդեն հաղորդել ենք՝ այսօր՝ հունիսի 21-ի առավոտյան, ՀՀ ԱԳՆ-ն հայտարարեց Պաղեստին պետությունը պաշտոնապես ճանաչելու մասին։

«Գազայում տիրող աղետալի հումանիտար իրավիճակը և շարունակվող ռազմական հակամարտությունն այսօր միջազգային քաղաքական օրակարգի՝ կարգավորում պահանջող առաջնային խնդիրներից մեկն է: Հայաստանի Հանրապետությունը կտրականապես մերժում է զինված հակամարտության ընթացքում քաղաքացիական ենթակառուցվածքների թիրախավորումը, քաղաքացիական բնակչության դեմ բռնությունները և քաղաքացիական անձանց պատանդառումն ու գերեվարումը և միանում է առանց նախապայմանների նրանց ազատ արձակման միջազգային հանրության պահանջներին:

Հայաստանի Հանրապետությունը միացել է ՄԱԿ-ի ԳԱ-ի բանաձևերին, որոնք կոչ են անում անհապաղ հրադադար հաստատել Գազայում: Ավելին, Հայաստանի Հանրապետությունն անկեղծորեն շահագրգռված է Մերձավոր Արևելքում խաղաղության և կայունության հաստատմամբ, հրեա և պաղեստինցի ժողովուրդների միջև տևական հաշտության կայացմամբ: Միջազգային տարբեր հարթակներում մենք մշտապես հանդես ենք եկել պաղեստինյան հարցի խաղաղ և համապարփակ կարգավորման օգտին և պաշտպանում ենք իսրայելա-պաղեստինյան հակամարտության լուծման՝ «երկու պետություն» սկզբունքը: Համոզված ենք, որ դա միակ ճանապարհն է երաշխավորելու, որ պաղեստինցիներն ու իսրայելցիները կարող են իրականացնել իրենց օրինական ձգտումները:

Ելնելով վերոնշյալից և վերահաստատելով իր հավատարմությունը միջազգային իրավունքին և ժողովուրդների հավասարության, ինքնիշխանության ու խաղաղ համակեցության սկզբունքներին՝ Հայաստանի Հանրապետությունը ճանաչում է Պաղեստինի պետությունը»,- նշված է ՀՀ ԱԳՆ-ի հայտարարության մեջ:

Աղբյուր` Փաստինֆո