Փաստ ինֆո

Վերջին շրջանի հայկական «դիվանագիտությունը» մի շատ տարօրինակ հատկություն է ձեռք բերել. կարծես թե կա երկու տեսակի հայկական դիվանագիտություն՝ մեկը հանրային, որն արտացոլվում է տարբեր պաշտոնական հաղորդագրությունների, հայտարարությունների միջոցով և ոչ հանրային, որի արդյունքների մասին իմանում ենք պոստֆակտում, ինչ-ինչ իրականություններից։ Այդ մասին «Փաստինֆո»-ի հետ զրույցում ասել է Սևծովյան տնտեսական համագործակցության կազմակերպությունում ՀՀ նախկին ներկայացուցիչ Կարեն Միրզոյանը՝ անդրադառնալով հայկական կողմի նախաձեռնությամբ նախօրեին տեղի ունեցած Փաշինյան-Էրդողան հեռախոսազրույցին։

Ըստ պաշտոնական հաղորդագրության՝ Փաշինյանը շնորհավորել է Թուրքիայի նախագահին Կուրբան Բայրամի առթիվ, իսկ Էրդողանն էլ նախապես շնորհավորել է գալիք Վարդավառի՝ Հիսուս Քրիստոսի Պայծառակերպության տոնի առթիվ, որը տեղի է ունենալու հուլիսին, ապա նաեւ ցավակցել Հայաստանի հյուսիսային շրջաններում մեկ ամիս առաջ տեղի ունեցած ջրհեղեղի կապակցությամբ։

Դիվանագետը ուշադրություն հրավիրեց այն փաստի վրա, որ Էրդողանն անդրադարձել է մոտ մեկ ամիս առաջ տեղի ունեցած ջրհեղեղին, այն էլ՝ հայկական կողմի նախաձեռնությամբ տեղի ունեցած հեռախոսազրույցի ընթացքում, մինչդեռ Թուրքիայում տեղի ունեցած երկրաշարժին Հայաստանի կառավարությունը ոչ միայն արագ արձագանքեց, այլ նաեւ օգնություն ուղարկեց։

«Կարծում եմ, որ հերթական անգամ ականատես ենք լինում, որ ինչ- ինչ պայմանավորվածությունների արդյունքում հայկական կողմը անհրաժեշտություն է զգացել արձանագրել որոշակի փաստեր։ Տպավորությունը, համենայն դեպս, այնպիսին է, որ թուրքական կողմը երբեք չի դրսևորում նախաձեռնողականություն, նախաձեռնողը հայկական կողմն է, խնդրողի դերում հայկական կողմն է, իրենք վերևից նայողի դիրքերից են հանդես գալիս»,- արձանագրեց Միրզոյանը։

Աղբյուր` Փաստինֆո