Փաստ ինֆո

Սամվել Վարդանյանը զրկված է ապրուստի միջոցներից։ Պաշտպանության կողմը միջնորդեց՝ թույլ տալ տնային կալանքի տակ գտնվող Վարդանյանին մեկ անգամ բանկ այցելել՝ սոցիալական կարիքների և վարկը մարելու համար։

«Փաստինֆո»-ի հաղորդմամբ՝ Երևանի ընդհանուր իրավասության քրեական դատարանում՝ դատավոր Դավիթ Արղամանյանի նախագահությամբ, այսօր կայացել է «ՔՊ»-ական պատգամավոր Հակոբ Ասլանյանին ավտոբուսում հրապարակային պարսավանքի ենթարկելու գործով դատալսումները։ Դատական նիստի մեկնարկին Սամվել Վարդանյանի պաշտպանը հայտնեց, որ բացարկի միջնորդություն ունեն՝ նախագահող դատավորին։ Բացարկի միջնորդության հիմքում դրվել է նախագահողի՝ անկողմնակալության մասով ողջամիտ կասկածները։ Դատարանը մերժեց ինքնաբացարկի միջնորդությունը։

Ապացույցների ծավալի հարցի քննարկման ընթացքում պաշտպանության կողմը միջնորդեց՝ հարցաքննել Սամվել Վարդանյանին, վերջինս նշեց՝ ցանկանում է ցուցմունք տալ։ Դատարանի կողմից ապացույցների հետազոտման հաջորդականության սահմանումից հետո պաշտպանության կողմը միջնորդեց՝ տնային կալանքի տակ գտնվող Սամվել Վարդանյանի տանը՝ օտարերկրյա քաղաքացիներին ընդունելու հնարավորության թույլտվության հարցը։ Սամվել Վարդանյանը պարզաբանեց, որ խոսքը սեփական տան մասին է, որտեղ կան մի քանի մուտքեր։ Դատարանը որոշեց հետաձգել այս միջնորդության լուծումը՝ պահանջելով, որ հաջորդ նիստին ներկայացվի նաև տան հատակագիծը։

Պաշտպան Վարազդատ Հարությունյանը նաև նշեց, որ, հաշվի առնելով Սամվել Վարդանյանի ծանր ֆինանսական վիճակը, վարկերը և, միևնույն ժամանակ, նկատի ունենալով, որ արգելված է «Բուքինգ» մուտք գործել, խնդրում են մեկ անգամ թույլ տալ Սամվել Վարդանյանին՝ բանկ այցելելու և վարկային պարտավորությունները սպասարկելու, սոցիալական կարիքները հոգալու համար։ Ըստ փաստաբանի՝ մեկ օրը բավարար է լինելու՝ ամբողջությամբ այդ գործընթացը կազմակերպելու համար։ Հանրային մեղադրող Հայկ Ավետյանն էլ նշեց, որ, եթե Պրոբացիայի ծառայությունը կկարողանա ապահովել և վերահսկել դա, ապա չի առարկում։ Հարցի քննարկումը շարունակվեց դռնփակ ռեժիմով։ Նիստի ավարտից հետո փաստաբան Ռուբեն Մելիքյանը զերծ մնաց մանրամասներ հայտնելուց՝ նշելով, որ դատարանը որոշել է հետագայում նիստերը դռնբաց ռեժիմով կքննել։

Հիշեցնենք, որ Սամվել Վարդանյանի և Հակոբ Ասլանյանի մասնակցությամբ միջադեպը հանրային տրանսպորտում տեղի է ունեցել 2024թ․ ապրիլի 15-ն։ Երիտասարդը, տեսնելով ՔՊ-ականին, հանրային պարսավանքի է ենթարկել նրան՝ անվանելով «հակահայ վիժվածք», ինչից հետո, ըստ հրապարակված տեսանյութի, Հակոբ Ասլանյանը հարվածել է երիտասարդին, թեև վերջինս հերքում է, որ խփել է՝ պնդելով, թե իբրև հրում էր պարզապես։ Դեպքի մասին հանրայնացումից կարճ ժամանակ անց իշխանությունների կողմից հրապարակային հայտարարություններ եղան՝ երիտասարդին պատասխանատվության ենթարկելու պահանջով, ինչից հետո երիտասարդը ձերբակակվեց՝ խուլիգանության կասկածանքով։ Պարզվել է, որ Հակոբ Ասլանյանը հանցագործության մասին հաղորդում է ներկայացրել, ինչի հիման վրա նույն օրը ՀՀ ՔԿ ԵՔՔՎ ծանր հանցագործություններ քննության բաժնում ՀՀ քրեական օրենսգրքի 297-րդ հոդվածի 1-ին մասի հատկանիշներով նախաձեռնվել է քրեական վարույթը: Երիտասարդը ձերբակալվել էր, ապա՝ վերցվել տնային կալանքի։ Սամվել Վարդանյանը մեղադրվում է ՀՀ Քրեական օրենսգրքի 297-րդ հոդվածի 1-ին մասի ՝ խուլիգանության և ՔՕ 329-րդ հոդվածի 2-րդ մասի՝ անձի նկատմամբ քաղաքական հայացքներով պայմանավորված հրապարակայնորեն ատելության խոսք արտահայտելու հատկանիշներով։

Նկատենք, որ Սամվել Վարդանյանը ձերբակալվածի կարգավիճակում խոշտանգվել է դիմակավորված անձանց կողմից։ Այս գործով ձերբակալվածներ չկան։

Հեղինակ՝ Իզաբել Սահակյան

Աղբյուր` Փաստինֆո