Փաստ ինֆո

ՀՀ տարածքում շուտով այնքան տեսախցիկներ կտեղադրվեն, որոնց արդյունքում, կարելի է ասել, ՀՀ ոստիկանությունը քաղաքացիներին կարող է հետեւել շաբաթը 7 օր՝ 27 ժամ ռեժիմով։ 50 քմ-ից մեծ սրճարանների, ռեստորանների, հյուրանոցների, առևտրի վայրերի, բենզալցակայանների մուտքին ու շինության մյուս կողմերին տեղադրելու են տեսախցիկներ և դա պարտադիր է դառնալու օրենքով։

Համապատասխան օրինագիծն ՀՀ ԱԺ-ն արդեն ընդունել է առաջին ընթերցմամբ։ Հնարավոր ռիսկերն այսօր քննարկել են տեղեկատվության անվտանգության մասնագետները։

«Առաջին ռիսկը հենց այն է, որ մենք սկսում ենք հանրային քննարկել իրականացնել՝ դրա ընդունումից հետո, լավ է, որ դեռ առաջին ընթերցումն է անցել», - տեղեկատվության անվտանգության մասնագետ Սամվել Մարտիրոսյանը։ Նրա փոխանցմամբ՝ այն, որ 50 քմ տարածք ունեցող օբյեկտների մուտքերը տեսահսկվելու են, արդեն նշանակում է, որ Երևան քաղաքը գրեթէ ամբողջությամբ ընկնում է տեսախցիկների հսկողության տակ, սա անվտանգության տեսակետից կտրուկ դրական է , բայց շատ հաճախ քաղաքացիական ազատության սահմանափակման է հանգեցնում»,- ասել է փորձագետը նշելով, որ այնպես չէ, որ այն երկրներում, որտեղ գործում է նման կարգ, դադարել են հանցագործություններ գրանցվել։
Ըստ նրա՝ որպես օրինակ Չինաստանն է նշվում, ինչը լավ օրինակ չէ, քանի որ այդ երկիրը միակուսակցական երկիր է ՝ տոտալ վերահսկվող քաղաքացիներով։ «ԱՄՆ- ն և Մեծ Բրիտանիա՞ն, հարցրեք իրենց ոստիկանությանը, այնպես չէ, որ գոհ են» , - ասաց Մարիտրոսյանը։

Անդրադառնալով ռիսկերին՝ Ս. Մարտիրոսյանը նշեց. «Հիմա բոլոր անմեղ, օրենքի տառին հետևող քաղաքացիներին անընհատ հետևելու են ինչ- որ մարդիկ ՆԳՆ-ում նստած։ Որտե՞ղ են հստակ երաշխիքները, որ պետությունը չի օգտագործելու, օրինակ, տեսանյութերը՝ քաղաքական դրդապատճառներով։Կամ չեն հետևելու լրագրողներին, որ բացահայտեն նրանց աղբյուրները։ Ո՞րն է երաշխիքը, որ կոռուպցիոն ռիսկեր չեն լինի, ինչ-որ մի չինովնիկ չի օգտագործի իր կնոջ սիրածին գտնելու համար։Առավել ևս ՀՀ պատմության մեջ ես հիշում եմ դեպքեր, որ տեսախցիկների մասնավոր նկարահանումները, մասնավոր կերպով ինչ-որ մարդիկ ստանում են և հանրայնացնում։ Ոչ մի իրավական հետևանքներ դա երբեք չի էլ ունեցել», - ասաց Մարտիրոսյանը։
Նրա գնահատմամբ՝ ստացվում է, որ փորձում են ապահովել անվտանգություն՝ չապահովելով դրա անվտանգությունը։

Աղբյուր` Փաստինֆո