Փաստ ինֆո

Կիրանց բնակավայրի բնակիչներին «ոչ ճշգրիտ տվյալների հիման վրա» կադաստրի կոմիտեի կողմից իրավունքի գրանցման վկայականներ տրամադրվելու, այլ խոսքով՝ կեղծ սեփականաշնորհման վկայականներ տալու մասին փաստեր առ այս պահը չկան։ Հետեւապես կարող ենք արձանագրել, որ Գրիգոր Մինասյանի ղեկավարած արդարադատության նախարարությունը պաշտոնապես տարածել է կեղծ տեղեկություններ։

Հիշեցնենք, որ արդարադատության նախարարությունը, թերեւս փորձելով հիմքեր ստեղծել ոչ միայն հանրային սեփականությունը, այլ նաեւ Կիրանցի բնակիչներին սեփականության իրավունքով պատկանող գույքը փաստացի առգրավելու ու թշնամուն հանձնելու համար, դեռեւս մայիսի 20-ին հայտարարել էր՝ մեջբերում ենք. «Պետք է փաստել, որ համապատասխան իրավունքների պետական գրանցումները կատարվել են ոչ ճշգրիտ տվյալների հիման վրա: Այդ գրանցումները չեն կարող իրավական հիմք հանդիսանալ պնդելու, որ անճշտությունների հիման վրա պետական գրանցումների կատարման փաստի ուժով խնդրո առարկա տարածքները համարվում են ՀՀ ինքնիշխան տարածքի մաս»։

«Փաստինֆո»-ն գրավոր հարցում էր ուղարկել ՀՀ գլխավոր դատախազություն՝ պարզելու, թե արդյո՞ք քրեական վարույթ կա նախաձեռնված՝ Կադաստրի պետական կոմիտեի կողմից կիրանցիներին սեփականաշնորհման կեղծ վկայականներ տրամադրելու վերաբերյալ, եթե այո, ապա՝ երբ է հարուցվել, ինչ հատկանիշներով, քանի նման կեղծ վկայական է տրվել, քանի անձ ունի տուժողի, ինչպես նաև՝ մեղադրյալի կարգավիճակ։ Ակնկալում էինք, որ գուցե նման կեղծ սեփականաշնորհման վկայականներ տալու դեպքեր են բացահայտվել, որ երկրի արդարադատության նախարարությունը պաշտոնապես նման հայտարարությամբ է հանդես եկել։ Բայց, ոչ, ՀՀ գլխավոր դատախազությունը պաշտոնապես հայտնել է, որ նման քրեական վարույթ չկա։

«Ձեր՝ 2024 թվականի հունիսի 7-ի հարցման կապակցությամբ հատնում եմ, որ դրանում նշված տեղեկատվությունը փոխանցվել է ՀՀ ազգային անվտանգության ծառայությանը՝ «Օպերատիվ-հետախուզական գործունեության մասին» ՀՀ օրենքով սահմանված կարգով ստուգելու նպատակով»,- ասվում է այսօր՝ հունիսի 19-ին, ՀՀ գլխավոր դատախազությունից ստացված պաշտոնական պատասխանում։

Նշենք, որ շուրջ մեկ ամիս առաջ Կադաստրի կոմիտեից «Փաստինֆո»-ի բանավոր հարցմանն ի պատասխան երաշխավորել էին, որ ՀՀ բնակիչներին սեփականաշնորհման վկայականները տրվել են ՀՀ օրենսդրության հիման վրա, իսկ այսօր ՀՀ գլխավոր դատախազությունն է հաստատում, որ կեղծ սեփականաշնորհման վկայականներ Կիրանցի բնակիչներին տրվելու մասին տվյալներ այս պահին չկան, քանի որ նման վարույթ էլ չունենք։ Այսինքն՝ Գ. Մինասյանը որեւէ փաստ չի ունեցել նման հայտարարությամբ հանդես գալու համար։ Ի գիտություն արդարադատության նախարարության՝ հայտնենք, որ «ոչ ճշգրիտ տվյալների հիման վրա» սեփականաշնորհման վկայականներ տալը ենթադրում է պաշտոնատար անձի կողմից պաշտոնական փաստաթղթում կեղծ տվյալներ ներառելը, ինչը պաշտոնեական կեղծիք է եւ քրեորեն պատժելի։ Եթե նման քրեական վարույթ չկա, ապա արդարադատության նախարարությունը ինչի հիման վրա է նման հայտարարությու արել։ Ակնհայտ է, որ այս պարագայում Գրիգոր Մինասյանի ղեկավարած կառույցն է «ոչ ճշգրիտ տվյալներով» հայտարարություն տարածել։ Նորմալ երկրում այդ անձն անմիջապես պաշտոնանկ կարվեր, բայց, ինչպես նշեցինք, դա նորմալ երկրում։

Ի դեպ, հունիսի 7-ին ուղարկված գրավոր հարցմամբ դատախազությանը խնդրել էինք հայտնել, թե արդյո՞ք քրեական վարույթ նախաձեռնվել է Կիրանցում ՀՀ քաղաքացիներին սեփականության իրավունքով պատկանող անշարժ գույքը, այդ թվում՝ հողատարածքները, Ադրբեջանին հանձնելու դեպքի առթիվ, եթե այո, ապա ինչ հատկանիշներով, քանի անձ է տուժող ճանաչվել, արդյո՞ք որևէ անձի նկատմամբ քրեական հետապնդում իրականացվում է, թե՝ ոչ։ Այս հարցին եւս տրվել է նույն պատասխանը՝ «տեղեկատվությունը փոխանցվել է ՀՀ ազգային անվտանգության ծառայությանը՝ «Օպերատիվ-հետախուզական գործունեության մասին» ՀՀ օրենքով սահմանված կարգով ստուգելու նպատակով»։

Աղբյուր` Փաստինֆո