Փաստ ինֆո

Շուռնուխի և Որոտանի կեսը Ադրբեջանին հանձնելով ՀՀ տարածքային ամբողջականության դեմ ուղղված Նիկոլ Փաշինյանի կառավարության հանցավոր գործողություններին իրավական գնահատական տալու հարցը հետապնդում է դատախազությանը։ Եթե նախկին գլխավոր դատախազ Արթուր Դավթյանի պաշտոնավարման օրոք, հանրության առաջ պատասխանատվությունից խուսանավելու համար, դատախազությունը հայտարարել էր, որ այդ հարցը քննարկման առարկա են դարձրել ու կտան համապատասխան իրավական գնահատական, ապա երեք տարի անց՝ արդեն Աննա Վարդապետյանի օրոք, նույն դատախազությունը չգիտի ինչ ասի՝ իրավական գնահատական տվել են, թե ոչ։ Եթե ոչ, ապա խախտել են ողջամիտ ժամկետը, եթե այո, ապա ինչ որոշում են կայացրել։

Մասնավորապես, 2020թ նոյեմբերի 10-ից՝ կապիտուլյացիոն ակտի ստորագրումից հետո Նիկոլ Փաշինյանը հայտարարեց «բանավոր ըմբռնման» հիման վրա Ադրբեջանի հետ սահման գծելու մասին ու հանրային գույքը, ինչպես նաեւ մարդկանց սեփականության իրավունքով պատկանող գույքը հանձնեց Ադրբեջանին։

«Փաստինֆո»-ն դեռեւս 2021 թվականի հունվարին գրավոր հարցում էր ուղարկել ՀՀ գլխավոր դատախազ Արթուր Դավթյանին՝ պարզելու, թե արդյո՞ք ՀՀ տարածքային ամբողջականության դեմ իրականացվող գործողությունների առնչությամբ քրեական գործ հարուցվել է, թե ոչ։ Բացի դա՝ մենք հարցմամբ նշել էինք, որ սահմանամերձ բնակավայրերի համայնքապետերի կողմից հնչեցված հայտարարությունների համաձայն՝ ապօրինի իրականացված սահմանազատման արդյունքում Ադրբեջանի հսկողության տակ են անցել Սյունիքի մի շարք ենթակառուցվածքներ, արոտավայրեր, բնակիչների տներ՝ պետությանը և քաղաքացիներին պատճառելով առանձնապես խոշոր չափերի գույքային վնաս։ Հետաքրքրվել ենք, թե արդյո՞ք դատախազությունն ընթացք տվել է նման ահազանգերին, եթե այո, ապա ինչ է պարզվել ուսումնասիրությունների կամ նյութերի նախապատրաստման արդյունքում, իսկ եթե այդ ահազանգերը քննության առարկա չեն դարձվել՝ խնդրել էինք նշել պատճառները։

«Փաստինֆո»-ի գրավոր հարցմանն ի պատասխան 12.01.2021թ. դատախազությունից պաշտոնական գրությամբ հայտնել էին, որ նշված հանգամանքները քննության առարկա են դարձել ՀՀ ՊՆ ռազմական վերահսկողության ծառայության նախկին պետ Մովսես Հակոբյանի հարցազրույցի ընթացքում հայտնած փաստերի հիման վրա ՀՀ ՀՔԾ-ում ՀՀ քրեական օրենսգրքի 308-րդ հոդվածի 2-րդ մասով հարուցված քրեական գործի շրջանակներում, որոնց կտրվեն քրեաիրավական գնահատական։

Այս պատասխանից 3 տարի անց «Փաստինֆո»-ն նորից գրավոր հարցում էր ուղարկել այս անգամ արդեն ՀՀ գլխավոր դատախազին Աննա Վարդապետյանին՝ նպատակ ունենալով պարզել, թե ինչ իրավական գնահատական է տրվել և եթե գնահատական չի տրվել, ապա արդյո՞ք չեն կարծում, որ խախտվել է քրդատօրենսդրության պահանջներն ու արդյոք համապատասխան քննիչներին, դատախազին պատասխանատվության ենթարկելու հարց բարձրացվել է։

ՀՀ դատախազությունից, սակայն, հրաժարվել են պատասխանել՝ արդյո՞ք գնահատական տրվել է, թե՝ ոչ և ինչ գնահատական է տրվել։

«2020թ նոյեմբերի 19-ին ՀՀ պաշտպանության նախարարության ռազմական վերահսկողության ծառայության նախկին պետ Մովսես Հրանտի Հակոբյանի կողմից հայտնած տեղեկությունների փաստով հարուցված քրեական գործի նախաքննությունն իրականացվում է գաղտնի ռեժիմով, որպիսի հանգամանքներով պայմանավորված հայցվող տեղեկատվությունը չի կարող տրամադրվել»,- նշված է գլխավոր դատախազության պատասխանում։

Ակնհայտ է, որ տվյալ պարագայում դատախազությունը կամայական մեկնաբանությամբ է մերժում տեղեկատվության տրամադրումը, եւ թույլ է տալիս Սահմանադրության խախտում. Հայցվող տեղեկատվությունը չի վերաբերում պետական գաղտնիքին։ Ավելին, անգամ Մովսես Հակոբյանի հայտարարությունների հիման վրա քրգործի հարուցումն անգամ պետական գաղտնիք չի համարվել ու այդ մասին հաղորդագրություն է տարածվել, իսկ Փաշինյանի կողմից Սյունիքի հողերը թշնամուն նվիրելու մասին տվյալներին իրավական գնահատական տալը, պարզվում է, պետական գաղտնիք է։

Սա ուղղակի, ոչ այլ ինչ է, եթե ոչ պետության անվտանգության դեմ ուղղված հանցագործություն։ Հիշեցնենք, որ ավելի վաղ մեր գրավոր մեկ այլ հարցմանն ի պատասխան դատախազությունից վստահաբար պնդել էին, թե ՀՀ տարածքային ամբողջականության դեմ ուղղված դեպքերով քրեական գործի հարուցումը մերժելու որոշում չի կայացվել։ Ստացվում է՝ Դատախազությունը՝ ի դեմս գլխավոր դատախազ Աննա Վարդապետյանի, շատ լավ գիտակցում է, որ Սյունիքի հողերի հանձնման գործընթացում խախտվել է ՀՀ տարածքային ամբողջականությունը, հետեւապես քրգործի հարուցումը չեն մերժել, բայց չունեն համարձակություն՝ կատարելու իրենց սահմանադրական պարտականությունը ու քրեական վարույթ նախաձեռնելու ՀՀ տարածքային ամբողջականության դեմ քայլ իրականացրած Փաշինյան Նիկոլի դեմ՝ դառնալով նրա հանցակիցը։

Սա եւս մեկ վկայություն է, որ Հայաստանում խախտված է սահմանադրական կարգը, ինչը պետք է քննարկման առարկա դառնա արդեն Սահմանադրական դատարանում։

Հեղինակ՝ Իզաբել Սահակյան

Աղբյուր` Փաստինֆո