Փաստ ինֆո

Հայաստանի պաշտպանական համակարգերը առնվազն 2020 թ-ից սկսած չեն գործում, չնայած, որ Հայաստանը ոչ միայն ՀԱՊԿ-ի անդամ երկիր է, այլև՝ ՌԴ-ի հետ ունի երկկողմանի պաշտպանական համաձայնագիր, որը նույնպես չի գործել։ Այս մասին «Փաստինֆո»-ի հետ զրույցում ասել է ռազմական փորձագետ Մհեր Հակոբյանը՝ անդրադառնալով ՌԴ փոխարտգործնախարար Միխայիլ Գալուզինի հայտարարությանը, թե անվտանգության ոլորտում Հայաստանի ինքնիշխանության հետագա քայքայումը և ԱՄՆ-ի ու ՆԱՏՕ-ի «թղթե հովանոցի» տակ անցումը պարզապես անհնարին կդարձնի Ռուսաստանի հետ և ՀԱՊԿ-ի շրջանակներում միասնական պաշտպանական տարածքի պահպանումը։

«Այս պայմաններում, եթե համարենք, որ ՀԱՊԿ-ը չկայացած կառույց է։ Հայաստանի դուրս գալը չեմ կարծում, որ լրջորեն խաթարելու է ՀԱՊԿ-ի գործունեությունը։ Սա առայժմ Ռուսաստանի անուժ զայրույթն է և զայրացած հայտարարություններն են, Ռուսաստանն այս պահին լիովին զբաղված է ուկրաինական պատերազմով և ոչ մի կերպ չի կարողանում անդրադառնալ Հարավային Կովկասին, արդյունքում, հիմա զայրացկոտ հայտարարություններից այն կողմ չի կարողանում անցնել։

Այդուհանդերձ, այս իրավիճակը վտանգավոր է, քանի որ մենք զայրացնում ենք աշխարհաքաղաքական առաջատար ուժերից մեկին, որը կարող է մեզ անկանխատեսելի վտանգների առաջ կանգնեցնել։ Այս իրավիճակում ամենավտանգովորն այն է, որ Հայաստանը, ըստ էության, դառնում է աշխարհաքաղաքական ուժերի մրցակցության թատերաբեմ, այսինքն, կոլեկտիվ Արևմուտքը և Ռուսաստանի Դաշնությունը սկսում են Հայաստանի տարածքում մրցակցություն իրականացնել, թե Հայաստանը ում է հասնելու։

Սա վտանգավոր է, կարող է հանգեցնել խառնաշփոթի, քաղաքակական երկհպատակության, ընդհուպ մինչև բախումի, ընդհուպ՝ երկիր կիսելու։ Սա  շատ հավանական հեռանկարի հարց է։ Այնպես որ, շատ վտանգավոր իրավիճակում ենք, չնայած, որ կոնկրետ Գալուզինի հայտարարությունները կոնկետ պրակտիկ հետևանքներ չեն ունենա»,- նշել է փորձագետը։

Գալուզինի պնդմանը, թե Հայաստանը ՀԱՊԿ-ին այլընտրանք չունի՝ Հակոբյանն ասաց, որ եթե քարոզիչ լիներ՝ ավելի հեշտ կկարողանար այդ հարցին պատասխանել, որովհետև ռուսամետ քարոզիչները կպնդեին, որ ՀԱՊԿ-ին այլընտրանք չկա, իսկ արեւմտամետը՝ կասեր, թե լավագույն լուծումն արևմուտքն է, իսկ իրականում, ոչ ոք, այս պահի դրությամբ, չի կարող ասել, թե քայլերը ուր կբերեն։

«Այնքան շատ են ուժերի խաչաձևումները և այնքան քիչ մենք ունենք տեղեկատվություն, որ բարդ է որևէ օբյեկտիվ գնահատական տալ։ Այո, լավ կլիներ, եթե Հայաստանը դառնար ՆԱՏՕ-ի անդամ, միանագամից Հայաստանը կմտներ ՆԱՏՕ-ի հովանոցի տակ, ինչպես մերձբալթյան երկրները, որոնք յուրաքանչյուրը 5-10 000-անոց բանակ ունենալով հոխորտում են Ռուսաստանի դեմ, Ռուսաստանն էլ ատամներն է կրճտացնում, ու ոչինչ չի կարողանում անել։ Բայց դրա հակառակ օրինակն էլ ՈՒկրաինան է, որին խաբեցին, մենք տեսել ենք, թե ինչ իրավիճակի առաջ է, ու այս ամենի հետ մեկտեղ երեկ ՆԱՏՕ-ի ղեկավարը հայտարարել է, որ ՈՒկրաինան կդառնա ՆԱՏՕ-ի անդամ, եթե հաղթի Ռուսաստանի դեմ պատերազմում։ Սա ծաղր է ու ապտակ։ Այո, եթե ՆԱՏՕ-ի լիարժեք անդամ լինենք՝ լավ է, հարցն այն է՝ կլինե՞նք։

Այսօր էլ տեղեկատվություն է տարածվում, որ ֆրանսիական զենքներ ենք ստացել, չգիտեմ՝ ճիշտ է, թե սուտ է, ինչ զենքեր են, գուցե իշխանական քարոզիչնե՞րն են տարածում, ու գուցե դեռ պիտի գան։
Հակառակ կողմում էլ ՀԱՊԿ-ն է, բոլորս էլ տեսել ենք թե ՀԱՊԿ-ը ինչպես է օգնում Հայաստանին վերջին 4 տարում։ Հիմա ինչպե՞ս ասենք, ՀԱՊԿ-ն է լավագույն լուծումը։ ՀԱՊԿ-ում էլ այլ խնդիրներ են առաջանում։

Այսինքն, այս պահին ոչ ոք չի կարող ասել, թե դեպի որ բևեռ բռնած ճանապարհը՝ ուր կտանի։ Շատ բարդ է այս պահին գնահատականներ տալ ու օբյեկտիվ վերլուծություն ներկայացնել»,- նշել է նա։

Աղբյուր` Փաստինֆո