Փաստ ինֆո

Իրականացվել է գաղտնի քննչական գործողություններ, ինչում ներգրավված է եղել և՛ ԱԱԾ-ն, և՛ ոստիկանությունը։ Մասնավորապես, ներքին, արտաքին դիտումներ, հեռախոսազանգերի հսկողություն են իրականացրել։ Այդ ամբողջն իրականացվել է ոչ իրավաչափ, որովհետև դրա համար բավարար չեն եղել այն պայմանները, որ կարող էին իրականացնել։ Այս մասին հրավիրված ասուլիսում հայտարարեց փաստաբան Արսեն Բաբայանը՝ անդրադառնալով սոցիալական ցանցերում հրապարակված, ապա՝ իշխանական ԶԼՄ-ներում զետեղված ձայնագրությանը, որի հիման վրա քրեական վարույթ է նախաձեռնվել՝ իբրև հավաքի մասնակիցներին նյութապես շահագրգռելու վերաբերյալ։

«Որ սրանք՝ որպես ապացույցներ՝ չանդվեն և դրանով չբացահայտվի իշխանության դեմքը, թե ինչ միջոցների են դիմում՝ անօրինական գաղտնալսումներ, անօրինական ներքին դիտումներ, նյութերը հավաքել՝ լցրել են իրենց կայքերում։ Այս նյութերը հանել են ոստիկանության աշխատակիցները, դրանք սղագրել են, ուղարկել ՔԿ, ասել՝ վարույթ նախաձեռնեք»,- ասաց Արսեն Բաբայանը՝ նշելով, որ ակնհայտ է՝ այդ նյութերը ոչ օրինական ճանապարհով ստացված նյութեր են, դրա հիման վրա նախաձեռնվել են ոչ օրինական քրեական վարույթներ, որոնց շրջանակներում անձինք են կալանավորված։ «Ժուչոկը» տեղադրվել է առանց դատարանի որոշման։

Քրեական վարույթի օրինականության հարց, սակայն, այս փուլում չի բարձրացվի, այդ հարցը, ինչպես նաև՝ ձայնագրությունների՝ որպես ապացույց թույլատրելիության հարցը կքննարկվի դատաքննության փուլում։ Արծվիկ Մինասյանն էլ հայտնեց՝ պատրաստվում են նաև հաղորդում ներկայացնել՝ ապօրինի գաղտնալսման և տվյալները հրապարակելու առթիվ։

Աղբյուր` Փաստինֆո