Փաստ ինֆո

Էնպես չի, որ էդ տունը իմ գեղեցիկ աչքերի համար են տվել, կամ էլ նվիրատվություն են արել, էդ տունը փոխհատուցում է։ Իմ տունը վերցրին տվին թուրքին, հիմա էլ փոխհատուցել են, նվիրատվություն չեն արել։

Այս մասին «Փաստինֆոյի» հետ զրույցում ասաց Շուռնուխի բնակիչ, համայնքի նախկին ղեկավարի եղբայրը՝ Արարատ Աղաբեկյանը՝ անդրադառնալով նախօրեին Շուռնուխում 13 տների սեփականատերերին Փաշինյանի կողմից բանակիները հանձնելու հանդիսավոր արարողությանը։

«Իմ տունը, իմ սեփականությունը, իմ այգիները, ամեն ինչը մնացել է թուրքին, հիմա էլ փոխհատուցում են, էդտեղ ուրախանալու բան չկա։ Մի ամբողջ պետություն են կորցրել, դե թող դա էլ փոխհատուցեն»,- ասաց ազատամարտիկը։
Դիտարկմանը, թե Շուռնուխի ժողովուրդը կարծես գոհ էր՝ նա պատասխանեց. «Դե, դրա համար էլ ասում են ժողովուրդ, այ, որ ազգ լինեին, ազգի նման մտածեին՝ էսպես չէր լինի։ Ամերիկայում էլ են ժողովուրդ, Ռուսաստանում էլ։ Ազգ չկա էնտեղ, էստեղ էլ չկա արդեն, եկեք չշփոթենք ժողովրդին՝ ազգի հետ։

Ուզում է վիլլա կամ դղյակ լինի, իմ ինչի՞ն է պետք, որ առավոտ բալկոնից նայեմ՝ թշնամուս ծածանվող դրոշները տեսնեմ։ Թող իմ տունս լիներ, իմ այգիները լինեին, իմ ջրառատ ակունքը լիներ, որ մնացել է թշնամու վերահսկողության տակ»։

Անդրադառնալով տների ջրամատակարարման խնդիրներին՝ նա նշեց, որ արդեն մի քանի ամիս է 60 տոննայանոց բետոնե ավազան են կառուցել, բայց դրանում հավաքված ջուրը նախատեսված չի եղել այս 13 տների համար, նախատեսված էր որպես օժանդակ ջուր՝ ներքևի թաղամասը սնուցելու համար։ «Հիմա 13 տներից որի ծորակը բացեցիր՝ ճնշումով ջուր է գալիս, բոլորիս էլ պարզ է, որ օգոստոսին խայտառակ վիճակ է լինելու։ Իսկ մեր մոտ ջրառատ ակունք չունենք, մերը ձնհալներից անձրևաջրերից գոյացած ջրեր են։

Անցած տարի Սանոսյանը, մարզպետը, քաղաքապետը, բոլորը իրազեկված էին խնդրի շուրջ, ասում էին՝ ջրի տեղն ասեք՝ մենք կբերենք։

Եղբայրը՝ Հակոբը Արշակյան գնաց ակունքը ճարեց Տաթև համայնքում, եկավ ներկայացրեց, որ մոտ 30 կմ հեռավորության վրա ջուր էր ճարել մաքուր, իսկական ձնհալի, սարի ջուր է, ասեց, որ եթե էդ ջուրը բերեն գյուղ, կկարողանան նաև Բարձրավանի ջրի խնդիրը լուծել։

Բայց դե՝ էս ծրագիրը սառույցի վրա գրվեց ու ոչ մի բան էլ չարվեց։ Հիմա սպասում ենք օգոստոսին, գյուղին պիտի ուղտեր տան, որ կարողանանք ուղտերով ջուր բերենք, ու ջրի սակավությունը լրացնենք, իսկ էն ջուրը, որ Արշակյանը ճարել էր՝ հոսում է Որոտանով՝ գնում է Ադրբեջան։ Մինչդեռ կարելի էր բերել՝ 2 գյուղի խնդիրը լուծել»։

Նա նաև նշեց, որ տները եվրոպական ոճով են կառուցել, իսկ տեղի կլիմայի առանձնահատկությունները հաշվի չեն առել։ «Եվրոպական սիլով են սարքել, ընդամենը, եթե նկարներն նայեք տանիքի՝ կտեսնեք, որ տանիքն էնպես է սարքած, որ անձրևաջրերը լցվելու են ուղիղ դռան մուտքի ու նկուղի մեջ, այսինքն, ձնապատնեշներ, հորդարաններ չկան դրված տանիքի վրա, որ եթե ձյուն գա՝ չլցվի բնակչի գլխին։

Հիմա էսպես ձմռանը 100 –ավոր սառույցներ է կապվելու ու հենց դռան մուտքի շեմից, հիմա ամեն անգամ տան դուռը բացելուց՝ բացառված չէ, որ սառույցները ուղիղ մարդու գլխին ընկնեն, բնական զենք է։ Շինարարաներին, որ ասում ենք, ասում են՝ գլխներիցս ձեռ չենք վերցրել, որ նախագծով լինի՝ մենք չանենք, էլ չեմ ասում, որ ավելացնենք»։

Աղբյուր` Փաստինֆո