Փաստ ինֆո

ՀՀ վարչապետ Նիկոլ Փաշինյանն Ադրբեջանին առաջարկում է ձևավորել հրադադարի ռեժիմի խախտման հետաքննության երկկողմ մեխանիզմ: Նա այդ մասին հայտնել է ՀՀ Սյունիքի մարզի Կապան քաղաքում «Քաղաքացիական պայմանագիր» կուսակցության նախաձեռնող խմբի նիստի ժամանակ։ Այս մասին Փաշինյանը հայտնել է տելեգրամյան իր օգտահաշվում։

Փաշինյանն անդրադարձել է հրադադարի ռեժիմի խախտման մասին Ադրբեջանի ՊՆ-ի վերջին հաղորդագրությունների վերաբերյալ հարցին։

«Երկու տարբերակ կա, թե ինչու է Ադրբեջանի ՊՆ–ն նման հաղորդագրություններ տարածում։ Առաջինը` իրոք հրադադարի ռեժիմի խախտում կա, իսկ երկրորդը`այդ տեղեկատվությամբ փորձ է արվում էսկալացիա կամ էսկալացիայի ֆոն ստեղծել։ Բոլոր դեպքերում և՛ առաջինը, և՛ երկրորդը մեր քաղաքական կամքը չէ։ Կարծում եմ, որ այս իրադրությունը որոշակի հասցեագրման կարիք ունի, ու ամեն անգամ ճշմարտությունն իրապես պարզելու համար վատ չի լինի, եթե հրադադարի ռեժիմի խախտման հետաքննության երկկողմ մեխանիզմ ձևավորենք»,– ասել է Փաշինյանը։
 
Նա շեշտել է, որ քաղաքական կամքի և պայմանավորվածության դեպքում դժվար չի լինի նման մեխանիզմ գործարկել։ ՀՀ վարչապետի կարծիքով` այդ ամենը կարելի է անել առանց բյուրոկրատական քաշքշուկի։

Աղբյուր` Փաստինֆո