Փաստ ինֆո

Սյունիքի մարզի Բարձրավան ու Շուռնուխ տանող կյանքի ճանապարհը սելավից ու գրունտային ջրերից կրկին փլուզվել է։ Խոտ – Որոտան ճանապարհի 7.5 կմ-ի հատվածն է, որը, բնակիչների նկարագրելով, հաճախ է վնասվում։ Այս տարի հեղեղումներն էլ ավելի մեծ վնաս են հասցրե։

«Այս ճանապարհը ամենակարճ ճանապարհն է, որով երեք համայնքի կարող ենք սնուցել, վերակենդանացնել։ Այստեղ 3 գյուղ ունենք, որտեղ բանկվում են, 2 գյուղ էլ լքված ունենք»,- «Փաստինֆո»-ին ասաց Գորիսի համայնքապետարանի քաղաքաշինության և կոմունալ տնտեսության բաժնի պետ, գլխավոր ճարտարապետ Գարեգին Փարսյանը։ Նշենք, որ մյուս ճանապարհը սկիզբ է առնում Տաթևից, որը բավական երկար է։

Գ.Փարսյանի փոխանցմամբ՝ ջրի պատճառով այդ ճանապարհն անընդհատ քանդվում է։

«Ես ճանապարհաշինարար չեմ, բայց չեմ կարծում, որ լուծման ձև չկա»,- ասել է պաշտոնյան՝ ավելացնելով, որ կարող են ճանապարհի դիրքը փոխել կամ կամուրջ դնել։ Ըստ նրա՝ գուցե այդպես մի քիչ թանկանա, բայց հաստատ ավելի թանկ է, երբ մի 8 անգամ փլվում է ճանապարհը, խոնավանում։

Գորիսի գլխավոր ճարտարապետի փոխանցմամբ՝ գրունտային ջրերը պատճառ չեն շինարարությունը դադարեցնելու համար, քանի որ կարելի է այլ բան մտածել. «մարդիկ անապատներում, ճահիճներում են ճանապարհներ սարքում։

Դիտարկվող՝ անմիխիթար ճանապարհը կյանքի ճանապարհ է դարձել Գորիս-Կապան ճանապարհի մի հատվածը Ադրբեջանին հանձնելու հետևանքով։

Ինչ վերաբերում է ճանապարհը քանդող գրունտային ջրերին, ապա Փարսյանն ասաց, որ դրանք միշտ եղել են։ «Ցածր կետ է, սարերի ջրերը մի քանի տեղից թափվում են ու փափկում է, ես որքան ինձ հիշում եմ, Որոտանում այդ խնդիրը եղել է։ Ուղղակի չեմ կարծում, որ Որոտանը ջուր չպետք է ունենա», - ասաց Փարսյանը՝ ավելացնելով, որ այս պահին ջրամբարը նորոգում են, ջուրը կտրել են։

Նա այն կարծիքին չէ, որ ջրի արտահոսք չպետք է լինի, քանի որ այդ հատվածում սարերի թեքություն կա, չի մշակվում, եւ եթե ջուրն ընդհանրապես կտրենա, ապա այդ հատվածն անապատացման կգնա , բնապահպանական խնդիր կլինի։

Փարսյանի փոխանցմամբ՝ իրենց ասել են, որ Ճանապարհի այդ հատվածում խնդիր է առաջանում նաև Տաթևի ՀԷԿ-ի ՕԿՋ–ի (օրական կարգավորվող ջրավազան) պատճառով։ Խոստացել են այն նորոգել, որից հետո միայն կշարունակեն ճանապարհի շինարարական աշխատանքները։Ճարտարապետն ասաց, որ ամեն դեպքում ինքը համաձայն չէ, որ հանուն ՀԷԿ-ի աշխատանքի պետք է բնապահպանական հարց առաջացնել։ Ու անգամ գրավոր նամակ են գրել ընկերությանը՝ զգուշացնելով խնդիրների մասին։

Ներկայումս, սահմանամերձ գյուղերի բնակիչներին խնդրում են, որ շարունակեն բնակվել իրենց գյուղերում, բայց ջրի խնդրի չկարգավորումը մեծ աղետի պատճառ կդառնա։

Բացի այդ՝ 50-ից 60 հեկտար անտառային հատված անապատացման վտանգի առաջ կկանգնի։

Աղբյուր` Փաստինֆո