Փաստ ինֆո

ՀՀ կառավարությունը հաստատեց «Ամպայինն առաջինը» քաղաքականության մշակման և ներդրման կարգը։

Բարձր տեխնոլոգիական արդյունաբերության նախարարի տեղակալ Ռուբեն Սիմոնյանն ասաց, որ նախագիծ ընդունման արդյունքում ակնկալվում է, որ պետական մարմինների կողմից օգտագործվող տեղեկատվական համակարգերի, դրանցում առկա տվյալների և տեղեկատվության պահպանման նպատակով ավանդական սերվերների փոխարեն պետք է կիրառվեն ամպային լուծումներ։

«Սա կապահովի պահուսավորման և պահպանման վստահելի մեխանիմզներ՝ տվյալների կորստից պաշտպանվելու համար։ Ամպային լուծումների կիրառությունը նպաստելու է նաև ՀՀ պետական իշխանության մարմինների կողմից օգտագործվող տեխնոլոգիական ենթակառուցվածքների արդիականացման և անվտանգության լրացուցիչ երաշխիքների ապահովմանը»։
Նա հայտնեց, որ սկզբնական փուլում նախատեսվում է, որ ամպային տիրույթում են տեղադրվելու այն տվյալները, որոնք չեն հանդիսանա պետական գաղտնիք և հանրային տեղեկությունների դասակարգման արդյունքներով կհամարվեն ցածր ռիսկայնության։

Նիկոլ Փաշինյանն ասաց, որ ՀՀ կառավարությունը որդեգրում է «Ամպայինն առաջինը» քաղաքականություն, ինչը նշանակում է, որ մենք մեր պետական տվյալները պիտի պահենք վիրտուալ տիրույթում։ «Եթե չունենք հիմնավորում, թե ինչու մենք այդ տվյալը չպետք է պահենք վիրտուալ տիրույթում, մենք այդ տվյալը չենք պահելու ֆիզիկական տարածքում։ Սա կարևոր է նրանով, որ ֆիզիկական տարածքում պահելը մեծ ծախսերի հետ է կապված։ Այսինքն, եթե մենք նախկինում մեր տվյալները թղթապանակներով էինք պահում՝ պահեստներում, հետագայում, երբ համակարգչային տվյալները մեզ հասանելի դարձան՝ սկսեցին համակարգիչներում պահվել։ Հետո համակարգիչների կրիչների թիվը սկսեց մեծանալ, դա կապված է մեծ ծախսերի հետ։

Հիմա սա աշխարհում ընդունված ծառայություն է և առաջարկվում են տիրույթներ, որտեղ այդ տվյալները կարող են պահվել։
Այստեղ կան նաև կիբերռիսկեր, բայց աշխարհը դրանք հասցեագրում է, ինչպես նաև կան տվյալներ, որոնք համարվում են ոչ զգայուն կամ պակաս զգայուն։ Մեր հաշվարկն այն է, որ այդ տվյալները ամպային տիրույթում պահելով ավելի քիչ միջոցներ կծախսենք, միաժամանակ այդ տեղեկությունների վնասվելու, ոչնչանալու հավանականությունը կնվազեցնենք, այդ տվյալների օգտագործելիությունը կմեծացնենք»։
Նա ընդգծեց, որ նոր պրակտիկան ներդնելու ճանապարհին մենք փուլային տարբերակով ենք գնում, «որպեսզի չստացվի այնպես, որ մենք ամեն բան լցնենք այդ տիրույթում, հետո մատներս սխալ կնոպկայի կպնի, ու պարզվի, որ ամբողջը կորսվել է»։

ԱԳ նախարար Արարատ Միրզոյանն էլ հարցրեց, թե. «բա որ մի օր լույսերը գնաց՝ ինչպես են տվյալներից օգտվելու։ Կարող է՝ 18 տարի ամեն ինչ նորմալ լինի՝ ու 19-րդ տարում մի բան լինի՝ ասենք ինտերնետի կաբելը կտրվի կամ համակարգը խափանվի, ու որևէ քաղաքացու մի ծննդական է պետք լինի, որը էլ թղթային տարբերակով չկա»։

Փաշինյանը պատասխանեց, որ այդ հարցը լուծելու համար մարդիկ տարիներով աշխատել են։ «Տեխնոլոգիա է՝ առաջ է գնում, ու դա արդեն սովորական բան է աշխարհում։ Երկրներ կան, որ արդեն նաև գաղտնի տեղեկություններն են այդտեղ պահում։ Բայց քանի որ մեր տեղեկություններն ավելի գաղտնի են քան նրանցը՝ դրա համար մենք դեռ մեծ քայլերով առաջ չենք գնում»։

Աղբյուր` Փաստինֆո