Փաստ ինֆո

Հեղեղումների հետևանքով Լոռիում վնասված երկաթուղու վերականգնման աշխատանքները բավականին լավ տեմպով առաջ են գնում, հնարավոր է՝ շահագործումը հնարավոր լինի նախատեսվածից ավելի վաղ: Այս մասինկառավարության նիստում ասաց Տարածքային կառավարման և ենթակառուցվածքների նախարար Գնել Սանոսյանը:

«Հունիսի 5-ից շահագործում ենք մինչև Այրում կայարան, բայց առաջիկա օրերին արդեն նոր հնարավորություններ կբացվեն, որպեսզի ամբողջությամբ օգտագործենք, իհարկե, որոշ սահմանափակումներով»,- ասաց նախարարը:

Անդրադառնալով փլուզված կամուրջների վերականգնմանը՝ Սանոսյանը նշեց, որ այս հարցով աշխատում են տարբեր երկրների գործընկերների հետ․ «Ունենք գործուղված գործընկերներ, որոնք հիմա դիտարկում են որոշ կամուրջներ, նաև տեղում առկա հնարավորություններն ենք դիտարկում։ Մեզ համար հատկապես չափազանց կարևոր է Ախթալայում գտնել տարբերակ, որ բեռնատարները նույնպես անցնեն: Ժամանակավոր կամուրջը հիմա մարդատար ու միջին ծանրության մեքենաների համար է ծառայում: Երեկ որոշակի քննարկում ենք ունեցել, թե ինչպես անենք, որ բոլոր տեսակի մեքենաներն անցնեն, որ հանքավայրի հետ կապված աշխատանքներն ամբողջությամբ բնականոն հուն մտնեն։ Հոբարձի կամրջի հետ կապված ժամանակավոր լուծում ենք գտել և հունիսի 15-ից աշխատանքներն այս ուղղությամբ կմեկնարկեն: Այսօր էլ Տավուշի մարզպետարանում Խաշթառակի կամրջի հետ կապված քննարկում է տեղի ունեցել, կրկին կտրվի ժամանակավոր լուծում»:

Նա տեղեկացրեց նաև, որ աղետի գոտում գազամատակարարումը, ջրամատակարարումն ու էլեկտրամատակարարումը մոտ 98-99 տոկսով վերականգնված է, որոշ տեղերում միացված չէ՝ կապված տեխնիկական կամ անվտանգային հարցերի հետ։ Առաջիկա օրերին կլուծվեն նաև ոռոգման հետ կապված հարցերը։

Աղբյուր` Փաստինֆո