Փաստ ինֆո

Այս շաբաթը ևս մեկ անգամ բացահայտեց ՀՀ իշխանությունների՝ Նիկոլ Փաշինյանի գլխավորությամբ, ողջ թշվառանքը։ Թե՛ քաղաքական, թե՛ իրավական տեսանկյունից այս իշխանության հակապետական, հակասահմանադրական, հակաազգային գործողությունները, ժողովրդավարության և իրավական պետության հանդեպ ծաղրանքը, զանգվածային ձերբակալությունները, քաղաքացիներին վնասվածքներ հասցնելը, ապօրինաբար հրաժարվելը՝ իրենց սահմանադրական պարտականությունների կատարումից արանագրումները ևս մեկ անգամ փաստում են, որ այս իշխանություններն անելիք չունեն։ Այս մասին խորհրդարանական ճեպազրույցների ընթացքում ասաց ԱԺ «Հայաստան» խմբակցության քարտուղար Արծվիկ Մինասյանը։

Պատասխանելով «Սիվիկ» լրատվականի հարցին, թե Բագրատ Սրբազանի՝ շենքը գրոհելու կոչից հետո են սկսվել են բախումները, արդյոք սահմանադրական կարգի տապալման փորձ չէ, Արծվիկ Մինասյանը նշեց, որ լրագրողի կողմից վկայակոչվածը՝ Բագրատ Սրբազանի և այլ քաղաքացիների կողմից իբրև գործողությունների վերաբերյալ՝ ամբողջությամբ կեղծ է։

«Ակնհայտ է, որ սահմանադրական կարգի տապալման մեղադրանքը պետք է առաջադրվի գործող իշխանության նկատմամբ և քրեական հետապնդում պետք է հարուցվի Նիկոլ Փաշինյանի, ուժային կառույցների այն ղեկավարների նկատմամբ, որոնք ապօրինի հրամաններ են տվել և խաղաղ երթի, առանց զենքի հավաքների արգելումը, խոչընդոտումը, խառնակչությունը, սադրիչների մեխանիզմների գործադրմամբ՝ վերագրել, թե իբր քաղաքացիները կատարել են հակասահմանադրական գործողություններ, բացարձակապես ոչ միայն իրականության հետ աղերս չունի, այլ՝ արվում է մեկ նպատակով՝ ժողովրդի շարունակվող խաղաղ անհնազանդության պահանջները փորձել վերածել կեղծ քրեական գործերի։ Բագրատ Սրբազանի խոսքը ուղղված է եղել բացառապես նրան, որ իր մուտքն ապահովեն, գա՝ զրուցի։ Ոչ մի գրոհի մասին խոսք չկա։ Մի բան հստակ է ՝ կեղծ և սխալ տեղեկատվության հիման վրա փորձել վերագրել մաքրամաքուր և հաշտության օրակարգով շարժման առաջնորդներին, մասնակիցներին վայրագություններ՝ դա ոչ միայն բարոյական չէ, այլև՝ քրեորեն պատժելի է»,- ասաց Արծվիկ Մինասյանը։

Աղբյուր` Փաստինֆո