Փաստ ինֆո

Իշխան Զաքարյանին չենք դիմել կառավարությանն անվստահություն հայտնելու ուղերձի համար, քանի որ սա այն նախագիծը չէր, որը պահանջում էր 36 ստորագրություն, 27-ն էլ էր բավարար։ Այս մասին լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը՝ ընդգծելով, որ իրենց մոտ հարց չի առաջացել, թե ինչու է 33 ստորագրություն, ոչ թե 36։

«Երկու խմբակցությունները ստորագրել են. իսկ 2 պատգամավոր՝ Մարտուն Գրիգորյանն են ու Տարոն Մարգարյանը, չեն ստորագրել զուտ տեխնիկական պատճառով է, մասնակցում էին սգո արարողությանը»։

Նա նշեց, որ իշխանությունը հիմա փորձում է խուսափել այս նախագծից, փորձում է դրան այլ բնույթ տալ, թե, իբր, իմպիչմենտի նախաձեռնությունը չկարողացան անել, սա են փորձում անել, մինչդեռ այս երկուսն իրար հետ բացարձակ կապ չունեն։ «Եթե հիշում եք՝ ամսի 9-ին Բագրատ Սրբազանը այս նախաձեռնության մասին ասաց, և 2 խմբակցությունները արագ որոշեցին ընթացք տալ։ Ուղերձի էությունը ինչպես իշխանությունն է սիրում ասել, ոչ թե ժողովրդի տված ձայները վերցնելն է, այլ առաջարկ, պահանջ, որպեսզի իշխանություն համարվող այս խումբն իր մեջ անի փոփոխություն»։

Մինասյանի դիտարկմամբ՝ ակնհայտ է, որ ծրագրում գրված է մի բան, սակայն իրականացնում են այլ բան։ «Իշխանությունն իր մեջ պետք է գտնի ուժ՝ փոփոխություն իրականացնելու։ Կառավարության ծրագրի փոփոխության այլ տարբերակ չկա։ Գործող կառավարության ծրագիրը կարող է փոփոխվել մի ձևով՝ կառավարությունը պետք է հրաժարական տա, ձևավորվի նոր կառավարություն, ներկայացնի նոր ծրագիր, այլ տարբերակ չկա»։

Աղբյուր` Փաստինֆո