Փաստ ինֆո

Լոռու մարզի բնակիչներն անհանագստացած են։ Ասում են՝ նման բան մինչ այս չէին տեսել, ոչ միայն Դեբեդ գետն է վարարել, այլև սարերից իջնող առուները։

«Ճանապարհներին շատ զգույշ ենք, այս օրերին Դեբեդը կրկին վարարում է ու այն հատվածներում, որտեղ ճանապարհին լիցք է արված, ժամանակավոր վերականգված է, գետը նորից հոսել է։ Ճանապարհից օգտվելը լիարժեք անվտանգ չէ»,- «Փաստինֆո»-ին ասաց տեղի բնակիչ Ռոբերտ Ղալայանը։

Նրա փոխանցմամբ՝ Ալավերդի համայնքում դեպի եկեղեցի տանող ճանապարհը շարունակում է քանդված մնալ։ «Գիշեր, ցերեկ են աշխատում, որտեղ ճանապարհ են սարքում, որտեղ մաքրում են, բայց դեռ շատ գործ կա ու լիարժեք բնականոն կյանքի անցնելու համար աշխատանքը շատ է»,- ասաց մեր զրուցակիցը։

Ինչ վերաբերում է ամենաշատը տուժած համայնքներին ՝ Քարկոփին ու Սանահին թաղամասին, ապա Ղալայանի խոսքերով, «անպետք դարձած բնակարանների թիվը բավական մեծ է։ Տներ կան, որ տիղմն այնպես է լցված, որ անգամ մաքրելու դեպքում այն անհնար է նորից տուն համարել, ավտոտնակներ կան, որտեղից մեքենան դուրս բերելը դեռ անհնար է , չգիտեն էլ նպատակարմարությունը»։

Այս օրերին անձրևները շարունակվում են ու դեռ վտանգը չի անցել, ոչ միայն գետը չի շարունակում իջնել, այլ բարձրանում է ու մաքրման, վերականգնողական աշխատանքներն իրականացնելիս պետք է զգուշավորություն ցուցաբերեն։

«Բնության արհավիրքին պետք է դիմակայել, հասկանալ, որ որքան բնությունը պարգև է, այնքան էլ խնամք է պահանջում»,- ասաց բնակիչը։

Աղբյուր` Փաստինֆո