Փաստ ինֆո

ԱԺ պատգամավորների մեկ քառորդով նախաձեռնել էինք ԱԺ ուղերձի նախագիծ, որն իրավունքի ուժով՝ որպես արտահերթ նիստ, պետք է քննարկվեր՝ ելնելով բավականին բարդ իրավիճակից, սակայն հերթական անգամ ԱԺ խորհրդի մեծամասնության կողմից՝ 15 ձայնից 13-ն իրենք են՝ մերժվեց։ Կարելի է ասել՝ որևէ հիմնավորում չկար։ Մենք ասել էինք, որ այս իրավիճակը քննարկման համար անհրաժեշտություն է, քանի որ ժողովրդի մի մասը դժգոհ է այսօրվա իշխանություններից, քանի որ այսօրվա իշխանությունը՝ հատկապես կառավարությունը, չի կատարել, չի կատարում և չի կատարելու իր 2021-26թթ կառավարության ծրագիրը՝ հատկապես Արցախի հարցի, ինքնիշխանության և այլ հարցերի հետ կապված։ Այս մասին լրագրողների հետ զրույցում ասաց ԱԺ «Հայաստան» խմբակցության ղեկավար Սեյրան Օհանյանը։

«Միջնորդությունը մերժվեց, բայց իրավունքի ուժով որպես արտահերթ նիստ այն կայանալու է և մեզ հնարավորություն է տրված ևս մեկ անգամ մեր հանրությանը ներկայացնելու»,- ասաց Օհանյանը։

Շարունակելով միտքը՝ «Պատիվ ունեմ» խմբակցության ղեկավար Հայկ Մամիջանյանը նկատեց՝ որևէ պատճառաբանություն չի ներկայացվել, բացառությամբ մեկի՝ իրենք համարում են, որ մեր երկրում ամեն ինչ նորմալ է՝ գյուղեր են հանձնվում, մարդիկ են փողոցում ծեծվում, դառնում քաղբանտարկյալ։

«Ես նիստի ժամանակ որևէ հավելյալ ասելիք չունեմ։ Միայն մեկ լուծում կա՝ իրենք պետք է լսեն ու կլսեն, որ երկրում ամեն ինչ նորմալ չէ և հաշվի կնստեն ժողովրդի ցանկության հետ»,- ասաց Մամիջանյանը՝ հավելելով, որ այս պահին դրսում շարժման առաջնորդ Բագրատ Սրբազանը դրա պատասխանը տալիս է․ «Այս ուղղության, այս հոսքի, այս առաքելությանն այլընտրանք պարզապես չկա։ Ինչքան շուտ իշխող խմբակցությունը դա հասկանա և ինչքան քիչ Դուք (դիմելով Սիվիկ լրատվականի լրագրողին ասաց Մամիջանյանը) սրբազանների մասին սուտ տեղեկություններ հրապարակեք, այդքան ավելի անցնցում կլինի այս խմբակի հեռացումը»։

Մամիջանյանի խոսքով՝ «ՔՊ» պատգամավորները շանս ունեն՝ հնարավորինս շուտ գլխի գալու։
«Ես վստահ եմ, որ այն ճնշումը, որն առկա է իրենց վրա, այդ թվում նաև՝ իրենց հարազատների կողմից, որովհետև որևէ մեկին պատիվ չի բերում լինել այն կարգավիճակում, որում իրենք են, ինչքան շուտ դարձի գան, այնքան՝ լավ»,- ասաց Մամիջանյանը։

Դիտարկմանը, որ ՔՊ-ն հայտարարել էր՝ արտահերթ նիստը տապալելու մասին՝ Մամիջանյանը ասաց․ «Իրենք տապալելու հետ խնդիր չունեն, իրենք արտաքին քաղաքականությունն են տապալել, անվտանգությունն են տապալել մեր երկրի, պատերազմի կազմակերպումն են տապալել․ այս մի նիստն էլ կտապալեն, բայց հավերժ ժողովրդից փախչել չեն կարող »։

Աղբյուր` Փաստինֆո