Փաստ ինֆո

Նոր Զելանդիայում 2 տարի 8 ամիս ազատազրկման են դատապարտել տարեց ուսուցչին, որը գայթակղել է աշակերտուհուն, իսկ հետո ամուսնացել նրա հետ: Այս մասին հայտնում է The New Zealand Herald-ը:

Դատարանում հայտնվել է մի տղամարդ, որն այժմ մոտ 70 տարեկան է։ Հետաքննությունը պարզել է, որ նա, 2008-2010 թվականներին աշխատելով միջնակարգ դպրոցի ուսուցիչ, սեռական ոտնձգություն է կատարել աշակերտուհու նկատմամբ, որն այդ ժամանակ 12-16 տարեկան էր: Մասնավորապես, դատարանը հայտարարել է, որ նա «դիպչել է աղջկա ազդրերին և հետույքին», երբ նա 13 տարեկան էր։ Ավելի ուշ աղջիկը տեղափոխվել է այլ դպրոց, սակայն տղամարդը շարունակել է հանդիպել նրա հետ։ Հանդիպումների ժամանակ նա «ամբողջովին մերկացնում էր» նրան, սակայն հրաժարվել է անմիջական սեռական կապի մեջ մտնել նրա հետ մինչև նրա համաձայնության տարիքը լրանալը՝ վախենալով քրեական հետապնդումից։

Երբ աղջիկը դարձել է 16 տարեկան, ուսուցիչը սկսել է սեռական հարաբերություն ունենալ նրա հետ: Երբ նա 22 տարեկան էր, տղամարդն ամուսնացել է նրա հետ, սակայն նրանք շուտով բաժանվել են։ Աղջիկը մեկնել է Ավստրալիա, որտեղ 2021 թվականին պատմել Է Նոր Հարավային Ուելս նահանգի ոստիկանությանը ուսուցչի կողմից բազմամյա բռնության մասին։ Ավստրալացի իրավապահները տեղեկությունը փոխանցել են Նոր Զելանդիայի գործընկերներին։ 2022 թվականին ուսուցչին առաջին անգամ հարցաքննել են։ Նա վստահ է եղել, որ ոչ մի անօրինական բան չի արել, քանի որ սեռական հարաբերություն է ունեցել աղջկա հետ, երբ նա 16 տարեկան է դարձել։

Մայիսի 30-ին դատարանը տղամարդուն դատապարտել է 2 տարի 8 ամիս ազատազրկման՝ 12-16 տարեկան անձի նկատմամբ սեռական գործողություններ կատարելու չորս մեղադրանքներով: Բացի այդ, տարեց հանցագործին ներառել են սեռական անձեռնմխելիության դեմ հանցագործություններ կատարած անձանց ցուցակում։

Աղբյուր` Փաստինֆո