Փաստ ինֆո

Երևանի ընդհանուր իրավասության քրեական դատարանի դատավոր Դավիթ Արղամանյանը, որը 2018թ․ իշխանափոխության ժամանակ ակտիվ մասնակցություն է ունեցել Նիկոլ Փաշինյանի հավաքներին և «թմբուկ խփել», հետայսու կքննի անձանց նկատմամբ ՕՀՄ-ներ իրականացնելու թույլտվության մասին միջնորդությունները։

Հունիսի 4-ին ԲԴԽ կողմից ընդունված նորմատիվ որոշմամբ՝ ՕՀՄ-ներ միջնորդություններ քննող դատավորների ցանկում դատավոր Ժորա Չիչոյանի անունը փոխարինվել է Դավիթ Արղամանյանով։ Որոշմամբ նաև նշված չէ, թե որն է այս փոփոխության պատճառը։ ՕՀՄ-ներ քննող դատավորների ցուցակում են նաև Երևանի քրեական դատարանի նախագահ Մնացական Մարտիրոսյանը, դատավոր Ջոն Հայրապետյանը և նույն դատարանի նախկին նախագահ Արթուր Մկրտչյանը, որն առաջիկա օրերին թոշակի կգնա։

Հիշեցնենք, որ Դավիթ Արղամանյանը նախկինում եղել է «կալանքի դատարանի» դատավոր, ապա՝ դատավորների ռեզերվում գտնվելուց հետո ապրիլին նշանակվել Երևանի քրեական դատարանի դատավոր։ Այսպես կոչված «կալանքի դատարանները» ստեղծվել են 2021թ․՝ ԲԴԽ նախագահի նախկին պաշտոնակատար Գագիկ Ջհանգիրյանի «թեթև ձեռքով» ՝ մի շարք աղմկահարույց գործերով անձանց կալանավորումներն «ապահովելու» համար, թեև պաշտոնական պարզաբանումը, իհարկե, դատարանների ծանրաբեռնվածությունը թեթևացնելն ու կոռուպցիոն ռիսկերը նվազեցնելու «բարի ցանկությունն» էր։ Այս դատարանում առավել աչքի ընկած դատավորներից մեկը հենց Դավիթ Արղամանյանն էր՝ Փաշինյանի ակցիաների ընթացքում «թմբուկ խփողը», որը, շարունակելով հոր՝ Վերաքննիչ դատարանի դատավոր Մհեր Արղամանյանի՝ իշխանությունների կամքը դակող դատավորի գործը, վերածվել էր «դահիճի»՝ «աջ ու ձախ ապահովելով» կալանքները։ Ինչևէ, դատարանը լուծարվել է մոտ մեկ տարի գործելուց հետո, իսկ 2023թ․ հունվարի 20-ին ԲԴԽ որոշմամբ՝ այդ դատարանի դատավորները ստացել էին ռեզերվային դատավորի կարգավիճակ։ Կարգավիճակը ձեռք բերած դատավորների մի մասն ավելի վաղ էր վերականգնվել դատավորի պաշտոնում կամ գործուղվել այս դատարան։

Հեղինակ՝ Իզաբել Սահակյան

Աղբյուր` Փաստինֆո