Փաստ ինֆո

Երբ մենք ոչ լավ օրից խոսում էինք նշաձող իջեցնելու մասին, դուք ոչ միայն չփորձեցիք լսել, թե ինչ ենք ասում, այլ բանաձև ընդունեցիք ԼՂ խորհրդարանում՝ «ծովից ծով» ԼՂ-ի մասին։ Այս մասին ԱԺ-ում 2023-ի բյուջեի կատարողականի քննարկման ժամանակ հայտարարեց ԱԳ նախարար Արարատ Միրզոյանը։

«Մոտեցում է, բան չասեցի, բայց դա հանգեցնում էր հաջորդ աղետին, հաջորդ աղետի դեպքում, երբ բանակցության կոչ էր արվում՝ դուռը շխկացնելով մերժվում էր այդ կոչը, որն էլ հանգեցնում է հաջորդ աղետին։ Երբ ինչ-որ մարդիկ ասում են՝ ինչ-որ բան սխալ է արվում, կային ինչ-որ մարդիկ էլ, որ շարունակում են նույն ոճով համառորեն գնալ դեպի անդունդը։

Հիմա դուք մեղադրում եք մյուս խմբին, որ ասում է մի րոպե, ժողովուրդ, մենք էլ էինք գնում էր ճանապարհով, բայց այդ ճանապարհը անդունդ է տանում։ Դուք ասում եք՝ ինչի՞ եք հրաժարվում մեր սրբազան անդունդային ճանապարհից, էդ ա մերը՝ գնանք, ցեղասպանվենք, հետո խփենք ծնկներիս՝ անընդհատ ասենք, թե անարդար մարդկությունը ևս մեկ անգամ հանդուրժեց Հայոց Ցեղասպանությունը։ Իսկ կարո՞ղ է այնպես անենք, որ այդ Ցեղասխանությունը չլինի»։

Անդրադառնալով արցախցիների վերադարձին ԼՂ՝ Միրզոյանն ասաց, որ անազնիվ է, որ իրենք ասում են իրենց տեսլականը և ըստ այդմ՝ կարող ենք քննադատվել կամ ոչ, իսկ ընդդիմությունն իր տեսլականը չի ասում։

«Խնդրում եմ, մարդկայնորեն խնդրում եմ, մանրամասնել, թե դուք ի՞նչ նկատի ունեք, երբ ասում եք վերադարձ ԼՂ, մասնավորապես, կենտրոնանալով հետևյալ նրբերանգների վրա.

Ի՞նչ պայմաններով եք առաջարկում , որ ԼՂ հայերը վերադառնան,

Արդյո՞ք դրանք այն պայմաներն են, որ առաջարկում է պաշտոնական Բաքուն, դա ինքնավարությո՞ւն է Ադրբեջանի կազմում, թե դա անկախ ԼՂ է։

Եթե դա «ստատուս-քվոն է», որ կար 2019-ին՝ դուք պատրա՞ստ եք դա անել 4000 զոհի գնով։

Առաջարկ արեք հարությանը, պատերա՞զմ եք առաջարկում, թե՞ ինչպես ձեր հերթական վարչապետի թեկնածուն է ասում՝ զինվորականները պիտի մեռնեն, դա էլ իրենց գործն է»։

Արծվիկ Մինասյանն ասաց, որ իրենք դիտարկում են այդ վերադարձը միջազգային իրավունքին համապատասխան, ոչ թե ռազմական գործողություններ առաջ մղելով։

«Վերդարձի իրավունքը միջազգային լայն կոնսոլիդացիայի հնարավորություն է, այս մոտեցումը պաշտպանվում է գրեթե բոլոր առաջադեմ երկրների կողմից, որոնց մեջ ես չեմ մտցնում Թուրքիան, այլ մտցնում եմ ԵՄ երկրներ, ԱՄՆ, տարբեր այլ երկրներ, որոնք պաշտպանում են վերադարձի իրավունքը և դրա վերաբերյալ անգամ հայտարարում են»։

Նա ընդգծեց, որ արցախահայությունը իր պատմական հայրենում ապրելու համար միջազգային երաշխիքներ պիտի ունենա՝ ստանալով ինքնավարության աստիճան։

«Մինչդեռ ձեր իշխանության չարածը բերում՝ բարդում եք մեր վրա»,-ասաց Մինասյանը։

Աղբյուր` Փաստինֆո