Փաստ ինֆո

ԱԱԾ տնօրենի տեղակալ Անդրանիկ Սիմոնյանն այդպես էլ չի ներկայացել դատարան՝ պատասխանելու իր իսկ հաղորդման հիման վրա հարուցված գործով հարցադրումներին։ Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է ԲԴԽ նախկին նախագահ, Երևանի ընդհանուր իրավասության դատարանի նախկին դատավոր Ռուբեն Վարդազարյանի գործով դատական նիստը։

Ինչպես արդեն տեղեկացրել ենք՝ ԱԱԾ տնօրենի տեղակալ Անդրանիկ Սիմոնյանը պարբերաբար չի ներկայանում դատական նիստերին՝ աշխատանքային ծանրաբեռնվածություն ունենալու պատճառաբանությամբ, միևնույն ժամանակ, չառարկելով, որ հրապարակվի իր նախաքննական ցուցմունքը։ Նման որոշում, ի վերջո, դատարանը կայացրել է՝ բավարարելով Սիմոնյանի նախաքննական ցուցմունքը հրապարակելու մասին մեղադրող Աշոտ Ժամկոչյանի միջնորդությունը։

Այսօրվա նիստի մեկնարկին պաշտպանության կողմը դատավորին ինքնաբացարկի միջնորդություն է ներկայացրել՝ կասկածի տակ դնելով դատարանի անաչառությունը, քանզի Անդրանիկ Սիմոնյանի՝ ծանրաբեռնվածության պատճառով պարբերաբար նիստերին չներկայանալը համարել է հարգելի՝ փորձելով սեփական մեկնաբանություններով պատճառաբանել Սիմոնյանի բացակայությունները։

Ներկայացված ինքնաբացարկի միջնորդությունը դատարանը մերժեց։ Հաջորդիվ՝ դատարանում հրապարակվեց Սիմոնյանի նախաքննական ցուցմունքները, որոնք, ըստ պաշտպանության կողմի, թերի են։ Մասնավորապես, պաշտպան Արամ Օրբելյանի դիտարկմամբ՝ բարձրացված հարցերի մի մասը քննիչի կողմից հանվել են։ Ըստ Անդրանիկ Սիմոնյանի նախաքննական ցուցմունքի՝ Փոլադյանը կապ է հաստատել իր հետ, հայտնել, որ ԲԴԽ նախագահը ցանկանում է կապ հաստատել իր հետ, չի հայտնել՝ ինչ թեմայով, պարզապես հետաքրքրվել էր, թե որ հավելվածով կարող է զանգել։ Անդրանիկ Սիմոնյանը նախաքննական ցուցմունքում պատմել է, որ ինքը չէր նկատել, թե «Սիգնալ» հավելվածով զանգ է ստացել, հետո նկատել է բաց թողնված զանգերը՝ անծանոթ հեռախոսահամարից, ապա նույն օրը՝ մի քանի ժամ անց զանգել է այդ հեռախոսահամարին։ Ըստ Սիմոնյանի՝ Ռուբեն Վարդազարյանին հեռակա է ճանաչել, գիտեր, որ ԲԴԽ նախագահ է։

«Ռուբեն Վարդազարյանին հետաքրքրել է իմ վարույթում քննվող՝ Վահագն Աբգարյանի խափանման միջոցի վերաբերյալ որոշումից։ Ես տեղեկացրել եմ, որ գտնվում եմ խորհրդակցական սենյակում։ Ռուբեն Վարդազարյանն ինձ առաջարկել է խափանման միջոց կալանքը փոխարինել անազատության հետ չկապված խափանման միջոցով, ինձ ասաց՝ գրավ կիրառել։ Ես ասացի, որ խորհրդակցական սենյակում եմ, դեռ չեմ որոշել, թե ինչ եմ անելու, սակայն նկատի կունենամ։ Ռուբեն Վարդազարյանն ինձ ասել է, որ դա անհրաժեշտ է իրեն, որ Վահագն Աբգարյանի մտերիմ Մարինա Պողոսյանը դադարի իր մասին սուտ լուրեր տարածելը։ Թե ինչ կապ ուներ Մարինա Պողոսյանը Ռուբեն Վարդազարյանի հետ՝ ես տեղյակ չեմ»,- ընթերցելով Սիմոնյանի նախաքննական ցուցմունքը՝ ասաց դատախազ Ժամկոչյանը, ապա շարունակեց հրապարակել ցուցմունքը, համաձայն որի՝ Սիմոնյանն անփոփոխ էր թողել Աբգարյանի խափանման միջոցը, այդ ընթացքում՝ մի քանի զանգեր ևս ստացել էր Վարդազարյանից, իսկ վերջին հեռախոսազանգը ինքը ձայնագրել է՝ հատուկ հավելվածով, որը ներկայացրել է հաղորդմանը կից։ Ըստ ցուցմունքի՝ Մարինա Պողոսյանը մեկ կամ երկու անգամ է նիստերի դահլիճ եղել, սակայն իր կողմից նկատողությունից հետո այլևս չի եկել։

Հիշեցնենք, որ ՀՀ ԲԴԽ նախկին նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասով՝ պաշտոնեական դիրքն օգտագործելով արդարադատության իրականացմանը խոչընդոտելու համար ու որպես խափանման միջոց կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի տեղակալ Անդրանիկ Սիմոնյանի հաղորդման հիման վրա։ Նշենք, որ քրեական գործը դատարան է ուղարկվել շուրջ մեկ տարի առաջ՝ 2021թ սեպտեմբեր ամսին, սակայն մեկ տարվա ընթացքում գործն այդպես էլ ապացույցների հետազոտման փուլին չէր հասել, գտնվում էր դատաքննության նավապատրաստման փուլում։ Այնուհետեւ Երևանի ընդհանուր իրավասության դատարանի դատավոր Մանվել Շահվերդյանը որոշում կայացրեց գործն ըստ ընդդատության Հակակոռուպցիոն դատարան ուղարկելու մասին և այժմ գործը դատավոր Վահե Դոլմազյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո