Փաստ ինֆո

Այսօր ԱԺ-ում իրենց կատարած աշխատանքը ներկայացնում էր ՀՀ կառավարության աշխատակազմի ղեկավար Արայիկ Հարությունյանը։

«Հայաստան» խմբակցության քարտուղար Արծվիկ Մինասյանը Արայիկ Հարությունյանից հետաքրքրվեց, թե ՀՀ ո՞ր օրենքով է փորձ արվել խոչընդոտելու կաթողիկոսի մուտքը՝ Սարդարապատի հուշահամալիր։ Նա վկայակոչեց ՀՀ օրենսդրությունը, ըստ որի՝ Ամենայն Հայոց կաթողիկոսնն ունի անարգել մուտքի իրավունք անգամ կառավարական շենք մասնաշենք, կաթողիկոսի մեքենան համարվում է հատուկ նշանակության տրասպորտային միջոց և պետք է ուղեկցություն ապահովի նաև պետական պահպանության ծառայությունը։

«Վերջերս մենք ականատես եղանք Ամենայն Հայոց կաթողիկոսի մուտքի արգելքին, խոչընդոտին Սարդարապատ, արդյոք կառավարության աշխատակազմում քննարկվե՞լ է այն հարցը, որ կաթողիկոսն ունի անարգել իրավունք Կառավարական թիվ 1 մասնաշենք, ավելին՝ կաթողիկոսի մեքենան համարվում է հատուկ նշանակության տրանսպորտային միջոց եւ պետք է ուղեկցում ապահովի ՊՊԾ-ն: Ձեր աշխատակազմում այս հացերը քննարկման առարկա եղե՞լ են, թե՞ ոչ եւ առհասարակ Հայ առաքելական սուրբ եկեղեցու եւ նրա կառավարման ներքո գտնվող պատմամշակութային եկեղեցիները, մատուռները ֆինանսավորելու հարց դրվե՞լ է, թե չի դրվել: Խոսքը նաեւ այլ երկրներում գտնվող եկեղեցիների մասին է»:

Ի պատասխան՝ Արայիկ Հարոթյունյանը հայտարարեց, թե 2018-ից հետո վարչապետի առաջարկով պետք է քննարկումներ տեղի ունենային Հայ առաքելական եկեղեցու եւ կառավարության միջեւ եւ դրա արդյունքում պետք է լուծվեին բոլոր այդ հարցերը, այդ թվում՝ հարկային դաշտի եւ աջակցության հետ կապված, բայց ցավոք սրտի Հայ առաքելական եկեղեցու ներկայացուցիչների համապատասխան պահվածքի պատճառով այդ երկխոսությունը չստացվեց:

«Երբ ՀԱԵ ղեկավարությունը ստանձնում է քաղաքական գործընթացների ղեկավարում, իշխանությունը համապատասխան գործիքներով է հարաբերվում տվյալ կառույցի հետ, այնպես, ինչպես կլինի ցանկացած քաղաքական խմբավորման հետ կապված, որը մասնակցում է քաղաքական այս կամ այն գործընթացին»: Ինչ վերաբերում է Սարդարապատի դեպքին, ապա Ա. Հարությունյանը նշեց, թե ՀԱԵ գլխին կանգնած կաթողիկոսը առաջնորդում է քաղաքական շարժում, որի ներկայացուցիչները թե՛ տվյալ օրը, թե՛ նախորդ օրը դրսեւորում են հասարակական կարգը խախտելու, ոստիկանության եւ տարբեր ինստիտուտների ներկայացուցիչների նկատմամբ սպառնալիքներ հնչեցնելուն ուղղված վարք, հետեւաբար անվտանգությունը ապահովող մարմիները պետք է համապատասխան վերաբերմունք ցուցաբերեին՝ պարզելու, թե արդյոք վեղարով տվյալ տարածք եկած խումբը չի պատրաստվում իր մյուս գործընկերների նման սադրել տվյալ միջոցառումը: Երբ որ պարզվել է, որ նրանք ընդամենը 2-3 րոպեով պետք է բարձրանան եւ հեռանան տարածքից, նրանց թույլատրվել է այցելել Սարդարապատի հուշահամալիրի տարածք»:

Ի պատասխան Մինասյանն ասաց, որ Հարությունյանի գնահատականները հակասում են օրենսդրությանը եւ, մեջբերելով «Կրոնական կազմակերպությունների» մասին օրենքը, փաստեց, որ հոգեւորականները կարող են մասնակցել հասարակական, քաղաքական կյանքին այլ քաղաքացիների հետ համահավասար. «Բա էն մյուս կրոնական կազմակերպություններին, որոնք համարվում են ոչ Հայ առաքելական սուրբ եկեղեցու ուղղվածության կազմակերպություն, նրանց նկատմամբ ի՞նչ վերաբերմունք եք ցույց տալիս, համարժե՞ք վերաբերմունք՝ սկսած սատանիստական կազմակերպություններից»:

Աղբյուր` Փաստինֆո